Ушаноўваць перадавікоў выязджаюць прама на працоўныя месцы. Так бы мовіць, без адрыву ад вытворчасці, бо разумеюць, што сёння кожная хвіліна на рахунку.
У чарговы раз віншаваць аграрыяў адправілася старшыня Капыльскага райкама прафсаюза работнікаў АПК Ірына Сцяпура. Разам з ёй і мы, каб адлюстраваць тых, хто працуе на зямлі з раніцы да позняга вечара. Да віншаванняў далучыліся старшыні мясцовых пярвічных прафсаюзных арганізацый.
І першая гаспадарка на нашым шляху - ААТ «Піянер-Агра». Тут заслужаныя падзячныя пісьмы, грашовыя прэміі і падарункі атрымалі механізатары з самымі высокімі паказчыкамі па сваёй гаспадарцы. На сяўбе яравых збожжавых вызначыўся Яўген Касач, унясенні мінеральных угнаенняў — Аляксандр Рацько, культывацыі — Аляксандр Дарашэвіч, унясенні і пагрузцы арганікі — Дзмітрый Кунцэвіч і Дзмітрый Дзіткоўскі, на падрыхтоўцы глебы — Іван Вярыга.
На трактары «Беларус-82» з сеялкай «Мека-4» Алег Сабалеўскі пасеяў 310 гектараў цукровых буракоў. Гэта найлепшы паказчык сярод тых, хто быў заняты гэтымі работамі. Варта адзначыць, што ў ААТ «Піянер-Агра» механізатар працуе менш за два гады, але ўжо паспеў зарэкамендаваць сябе з лепшага боку. На працягу сельскагаспадарчага года Алег Сабалеўскі выконвае многія сезонныя работы: яму па плячы і прасаванне саломы, і ўнясенне арганікі, і касьба.
— За абаранкам трактара — колькі сябе памятаю, — расказвае мужчына, — таму ў іншай сферы сябе неяк і не ўяўляю.
А дома Алега Сабалеўскага чакаюць жонка Наталля, сын Багдан і дачка Сабрына, якія заўсёды імкнуцца падтрымліваць галаву сям'і, разумеючы, якім стомленым ён часта прыходзіць з працы.
У ААТ «Ціміразеўскі» словы падзякі гучалі ў адрас Валерыя Раскавінскага, які вызначыўся на падкорме цвёрдымі мінеральнымі ўгнаеннямі, а вось на падкорме вадкімі лепшым стаў Дзмітрый Жданко. На ўнясенні і пагрузцы арганікі самыя высокія паказчыкі - у Аляксандра Турбана і Сяргея Шугалея. На ворыве, сяўбе і культывацыі на перадавыя пазіцыі па зводках сельгаспрадпрыемства выйшлі Віктар Лагун, Іван Корзун і Сяргей Сала, адпаведна.
Віншаваць механізатара ААТ «Семежава» Дзмітрыя Ражко з райцэнтра прыязджаюць не ўпершыню. Работнік рэгулярна сярод лідэраў. Ды і вопыт у яго вялікі - у гаспадарцы працуе з 2010 года. Увесну - на сяўбе яравых збожжавых, пасля - на нарыхтоўцы кармоў. Летам садзіцца за штурвал збожжаўборачнага камбайна, а восенню зноў ворыва і сяўба, толькі ўжо азімых культур. І толькі зімой у механізатара адносна спакойныя працоўныя будні, хаця і ў марозныя месяцы клопатаў хапае: трэба падрыхтаваць тэхніку да будучага сезону.
У ААТ «Семежава» словы падзякі за добрую і якасную працу прымаў і Аляксей Клімовіч. Ён стаў лепшым у сваёй гаспадарцы на пагрузцы арганікі: на «Амкадор» перавёз 10382 тоны.
Наступная гаспадарка ў нашым маршруце - КСУП «Дактаровічы». Да віншаванняў далучыўся і дырэктар сельгаспрадпрыемства Сяргей Шарупіч.
Кожнаму работніку Сяргей Яўгенавіч сказаў асобныя словы падзякі, а агульная характарыстыка гучала прыкладна так: «Працавітыя, адказныя, адукаваныя. Радасна, што ў нашай гаспадарцы ёсць такія людзі». Тут узнагароды за працу атрымалі Алег Бортнік, Сяргей Дзісяк, Аляксандр Шчэрба, Дзмітрый Макарчук, Мікалай Коршук, Юрый Галушка, Максім Семянцоў і Міхаіл Дарашэвіч. У кожнага з іх апроч працы хапае клопатаў і дома. Напрыклад, у Алега Бортніка ў хатняй гаспадарцы ёсць конь.
- І ўся амуніцыя ёсць, і воз маленькі, і нават сані, - дзеліцца сваім захапленнем механізатар. — Я вельмі люблю коней, мой дзядуля Віктар быў конюхам у калгасе, таму гэтае захапленне родам з дзяцінства.
Наступны прыпынак — ААТ «Скабін», дзе аднымі з лепшых на вясновай сяўбе сталі механізатары Андрэй Волкаў, Іван Салаш, Сяргей Ермаліцкі, Вадзім Пархомчык, Іван Лук'янавіч і кіроўца Іван Будзько. Разам з Ірынай Сцяпурай работнікаў віншаваў дырэктар гаспадаркі Аляксандр Хвіцько.
У гэтыя дні ў адрас працаўнікоў палёў з усіх сельгаспрадпрыемстваў раёна прагучала нямала добрых слоў, падзяк за праведзеную працу. Уручаючы ўзнагароды, Ірына Сцяпура адзначала важнасць выкананай імі працы, дзякавала за адданасць роднай зямлі і жадала моцнага здароўя, поспехаў у працы і шчасця ў асабістым жыцці.
Крысціна Жогаль
Крыніца http://www.kopyl.by