Лета на гарадской плошчы пачалося з доўгачаканага сонечнага і цёплага надвор'я, а свята з прывітання намесніка начальніка ўпраўлення адукацыі, спорту і турызму райвыканкама Святланы Сташанiнай. Яна павіншавала рабят з заканчэннем навучальнага года, пажадала актыўнага, цікавага, а галоўнае - бяспечнага адпачынку.
- Аздараўленчая кампанія ў рэгіёне стане, як і заўсёды, маштабнай — адзначыла Святлана Іванаўна. — Увагай будуць ахоплены каля тысячы школьнікаў. - Я жадаю, каб ваша аздараўленне прайшло з карысцю, вы завялі новае сяброўства і знаёмствы, каб любоў да роднай Беларусі ў вашым сэрцы станавілася ўсё большай і большай.
З першым днём лета юных капылян павіншавала і старшыня раённага Савета ветэранаў Людміла Каменка, якая пасля ўручыла дыплом і падарунак Беларускага грамадскага аб'яднання ветэранаў Марыі Паляшчук, фіналісту рэспубліканскага конкурса дзіцячага малюнка «Нам мiр завешчана берагчы».
У пацверджанне таму, што сумаваць летам дзецям не прыйдзецца, цэнтрам творчасці дзяцей і моладзі Капыльскага раёна былі падрыхтаваны забавы не толькі цікавыя, але і карысныя. Яны ўдзельнічалі ў конкурсах і гарэзавалі на гульнявых і інтэрактыўных зонах Белаграпрамбанка, ГА «БРСМ», Капыльскага цэха прыроднага і звадкаванага газу. Незабыўныя эмоцыі выклікала і дэманстрацыя патрульнай машыны: бо ўбачыць, як знутры абсталяваны аўтамабіль з пробліскавымі маячкамі, заўсёды цікава і захапляльна. А на інтэрактыўнай пляцоўцы, арганізаванай Капыльскім РАНС, дзеткі з задавальненнем прымяралі на сябе касцюм ратавальніка, маглі задаць супрацоўнікам цікавячыя пытанні і разам з імі пачытаць карысныя буклеты на тэму бяспекі.
Па традыцыі прайшоў і конкурс малюнкаў на асфальце. Рознакаляровымі крэйдамі хлопцы малявалі сонца і неба, дзяцей і кветкі, жывёл і прыроду — усё тое, што на іх думку азначае простае паняцце - мір ва ўсім свеце. Членам журы было цяжка выбраць лепшага з юных мастакоў, таму салодкія прызы ад раённага аб'яднання прафсаюзаў, ГА «Беларускае таварыства інвалідаў» і Беларускага Чырвонага Крыжа атрымалі ўсе ўдзельнікі.
Пасля святочнае дзейства перамясцілася ў будынак раённага цэнтра культуры. Канцэртная праграма «Мары спраўджваюцца» ў чарговы раз прадэманстравала, што на Капыльшчыне растуць таленавітыя і творчыя асобы.
Іх музычныя нумары падарылі ўсім прысутным зарад добрага настрою і шмат станоўчых эмоцый.
Таццяна БОХАН
Крыніца «СП»
