- Мы дэманстравалі ткацтва на кроснах і майстар-клас па пляценні пояса на ніту, - распавядае Таццяна Мікалаеўна. - Нашы калегі з Клецкага раёна паказалі гліняныя цацкі, разьбу па дрэве, маляванне, лялек ручной работы, а прадстаўнікі Мінска - пляценне пояса на бярдэчцы. Таксама праходзілі майстар-класы.
Адкрыла XIII Рэспубліканскі фестываль нацыянальных культур шматнацыянальнае шэсце. Яно заўсёды становіцца адным з самых яркіх дзействаў, якое збірае мноства гледачоў і дэманструе адначасова разнастайнасць і адзінства, згоду народаў, якія жывуць у Беларусі. Госці віталі прадстаўнікоў каля 30 нацыянальнасцяў.
Звяртаючыся да ўдзельнікаў фестывалю, міністр інфармацыі Рэспублікі Беларусь Уладзімір Пярцоў адзначыў:
– Ідэйна гэта адно з галоўных свят у нашай краіне, бо яно ўвасабляе дух беларусаў. У нас ніхто і ніколі не пытаўся ў іншага, якой ён нацыянальнасці, якая яго дарога да храма, у якога бога ён верыць. І гродзенская зямля, мусіць, самая паказальная ў гэтым плане. Тут у міры і згодзе пражываюць каля 150 нацыянальнасцяў. Каб канчаткова паставіць кропку ў гэтых пагалосках пра нейкія прыгнёты, я ўсім заўсёды раю адкрыць тэлефонны даведнік кіруючых працаўнікоў Гарадзенскай вобласці. У ім ёсць любыя прозвішчы, імёны і імёны па бацьку: польскія, літоўскія, татарскія, яўрэйскія. І гэтыя людзі не проста жывуць тут, а працуюць у розных органах улады на карысць нашай роднай Рэспублікі Беларусь, і Гродзенскай вобласці ў прыватнасці.
Падчас правядзення фестывалю ў цэнтры горада разгарнуліся 18 падворкаў, якія аб'ядналі самыя розныя нацыянальнасці, якія жывуць у Беларусі. Армяне, грузіны, яўрэі, палякі, рускія, украінцы, цыганы, італьянцы, літоўцы, грэкі - кожны народ дэманструе сваю самабытнасць. Госці знаёміліся з народнымі танцамі, песнямі, кухняй: толькі ў першы дзень фестываль наведалі больш за 60 тыс. чалавек.
А завяршыўся фестываль мерапрыемствамі на Аўгустоўскім канале. Для гасцей свята падрыхтавалі лакацыі з дэгустацыяй страў нацыянальнай беларускай кухні, прыгатаваных па арыгінальных рэцэптах практычна з усёй Гродзенскай вобласці, адкрытыя спаборніцтвы з вясёлымі перашкодамі, курыныя бегі, спартыўную пляцоўку ад мясцовых асілкаў, а таксама спаборніцтвы па рыбнай лоўлі. На галоўнай сцэне гасцей фестывалю нацыянальнасцей радавалі выступленні ансамбляў і харэаграфічных калектываў.
Дыяна ТКАЧАНКА
Крыніца http://www.kopyl.by