Сустрэча пачалася ў раённым краязнаўчым музеі, дзе сярод прысутных былі старшыня Мінскай абласной арганізацыі Беларускага прафесійнага саюза работнікаў адукацыі і навукі Таццяна Апраніч, начальнік упраўлення па адукацыі, спорце і турызме райвыканкама Алена Карповіч, старшыня райкама прафсаюза работнікаў адукацыі і навукі Марына Крэпская.
Прысутныя азнаёміліся з выставай «Генацыд — злачынства без тэрміна даўніны», а старэйшы навуковы супрацоўнік музея Андрэй Лятчэня распавёў пра жахi вайны на тэрыторыі Капыльскага раёна. Не абышлося і без прагляду выставы, прысвечанай гісторыі з'яўлення Капыля, дзе многія маладыя настаўнікі даведаліся аб разнастайнасці фактаў станаўлення мястэчка з вялікай векавой гісторыяй.
Некаторыя падчас сустрэчы выказалі меркаванне, што падобныя дыялогавыя пляцоўкі, якія праходзяць у краязнаўчым музеі, маюць нямала станоўчых фактараў — тут можна даведацца шмат новага пра Вялікую Айчынную вайну, гісторыю роднага краю, а таксама яшчэ раз падумаць пра тое, як добра, што мы зараз жывем пад мірным небам.
Таццяна Апраніч, у сваю чаргу, адзначыла актыўнасць і імкненне моладзі ў дасягненні новых мэт.
— Я вельмі шаную добрасумленных і добрых людзей, — падзялілася Таццяна Валянцінаўна. — Цешыць, што ў нашай краіны такая багатая і каштоўная будучыня, такая выдатная моладзь, здольная працягваць будаваць квітнеючую і незалежную Беларусь.
Дарэчы, аб дасягненнях. У гэты дзень без узнагарод не абышлося. Таццяна Апраніч уручыла Падзякі лепшым членам галіновага прафсаюза Капыльшчыны. Так, за добрасумленную працу ў сістэме адукацыі, актыўны ўдзел у грамадскай дзейнасці ўстановы і пярвічнай прафсаюзнай арганізацыі, умацаванне іміджу галіновага прафсаюза і прафсаюзнага руху ўзнагароды ўручаны настаўніку-дэфектолагу ясляў-сада №6 г. Капыля. Дар'е Пазняк, педагогу-псіхолагу ясляў-сада №6 г. Капыля Марыі Дзічкоўскай, настаўніку англійскай мовы сярэдняй школы №3 г. Капыля Крысціне Саладуха, выхавацелю групы падоўжанага дня сярэдняй школы №2 г Капыля Паліне Акінчыц.
Удзельнікі сустрэчы адзначылі, што такія мерапрыемствы яшчэ больш збліжаюць калектывы і даюць магчымасць з карысцю бавіць час.
Напрыканцы ўдзельнікі дыялогавай пляцоўкі ўсклалі кветкі да помніка загінуўшым землякам, устаноўленаму каля Дзіцячай школы мастацтваў.
Павел Шэін
Крыніца «СП»
