— Лагер працы і адпачынку ва ўстанове адукацыі існуе ўжо многія гады, — гаворыць кіраўнік аздараўленчага лагера Таццяна Колас. – Асноўнай мэтай дзейнасці ЛТА заўсёды было і будзе прывіццё дзецям любові да працы, фарміраванне ў іх разумення працы як асобаснай і сацыяльнай каштоўнасці, прафесійная арыентацыя падлеткаў, фарміраванне здаровага ладу жыцця.
На тэрыторыі школы атрад «Равеснікі» выконвае розныя віды працы: хлопцы паліваюць расліны, праводзяць праполку дэкаратыўных раслін і агароднінных культур, зграбаюць і прыбіраюць траву пасля абкошвання ўчастка рабочымі ўстановы адукацыі, ачышчаюць асфальтавыя і пліткавыя пакрыцці, працуюць у бібліятэцы.
- Усе хлопцы валодаюць працоўнымі навыкамі. Дысцыплінаваныя і выканаўчыя, яны адказна ставяцца да працы, - працягвае кіраўнік лагера. - Але выхаванне прадугледжвае не толькі фарміраванне працоўных уменняў і навыкаў. У абавязковым парадку ў другой палове дня арганізуюцца выхаваўчыя і спартыўныя мерапрыемствы, экскурсіі, сустрэчы. У гэтым годзе мерапрыемствы прысвечаны Году гістарычнай памяці і праходзяць у рамках абласной акцыі «Лета патрыётаў».
Згодна з планам працы лагера, хлопцы кожны дзень спазнаюць нешта новае і цікавае. Так, у лагеры працы і адпачынку прайшла інфармацыйная гадзіна па грамадзянска-патрыятычным выхаванні «Нашы сімвалы - наш гонар», адбыўся прагляд цыкла тэлевізійных фільмаў аб дасягненнях Беларусі, а таксама мерапрыемствы, прымеркаваныя да 140-годдзя Якуба Коласа і Янкі Купала. Цікавым і займальным быў інфармацыйна-адукацыйны праект «ШАГ» на тэму «Права на адпачынак і аздараўленне», у рамках якога хлопцы сустрэліся з вядучым спецыялістам прадстаўніцтва Мінскае абласное ўпраўленне Рэспубліканскага цэнтра па аздараўленні і санаторна-курортным лячэнні насельніцтва Інай Корзун. Акрамя гэтага, хлопцы наведалі Капыльскі РАУС і Спаса-Узнясенскі храм. Наступны маршрут будзе накіраваны ў Капыльскі РАНС, літаратурны музей Кузьмы Чорнага, раённы краязнаўчы музей, бібліятэку. Адбылася запамінальная і займальная паездка на мемарыяльны комплекс «Курган Славы» і ў музей гісторыі Вялікай Айчыннай вайны. Запланаваны і сумесныя працоўныя акцыі з раённым камітэтам ГА «БРСМ».
— Хочацца адзначыць, што сёлета сфармаваўся вельмі выдатны атрад лагера працы і адпачынку, — гаворыць старэйшы выхавацель Таццяна Мароз. - Яны ўсе матываваныя і працаздольныя, і калі задача пастаўлена, то яна на 100% выконваецца.
Таццяна Уладзіміраўна дадала, што кожны дзень з дзецьмі праводзіцца ўводны інструктаж па тэхніцы бяспекі, які ўключае пытанні аховы жыцця і здароўя. Таксама праходзіць навучанне правілам бяспечных паводзін пры арганізацыі працоўнай дзейнасці, фізкультурна-аздараўленчых мерапрыемстваў, экскурсій.
- Калі на вуліцы занадта горача, то мы працуем у школьнай бібліятэцы, - кажа васьмікласніца Мілана Духноўская. — Тут мы сартуем і складаем падручнікі, адбіраем кнігі з іншых бібліятэк раёна і вобласці. І калі яны падлягаюць рамонту, мы іх аднаўляем.
— Я доўга не разважала, уступаць у склад атрада ці не, — расказвае чатырнаццацігадовая Анастасія Давыдзенка, — адразу пагадзілася. Ды і некаторыя аднакласнікі таксама былі не супраць - разам нашмат весялей. Да таго ж з'явіліся новыя знаёмствы.
Дзевяцікласнік Максім Пракапеня упэўнены, што лагер працы і адпачынку – гэта добрая магчымасць адцягнуцца ад гаджэтаў і пазнаёміцца з новымі хлопцамі.
- Адзначу, што ў лагеры нас добра кормяць, - кажа васьмікласнік Цімафей Курачоў. - У дзень мы працуем па 4 гадзіны з перапынкам 15 хвілін кожную гадзіну. Да абеду мы працуем, а пасля мы гуляем у спартыўныя гульні і ўдзельнічаем у розных выхаваўчых мерапрыемствах.
Наталля Давыдзенка
Крыніца http://www.kopyl.by