— Месцы, не абсталяваныя для купання, на асаблівым кантролі. на кожным такім возеры стаяць інфармацыйныя таблічкі, якія забараняюць лезці ў ваду, - распавядае старэйшы інжынер сектара арганізацыі функцыянавання дзяржаўнай сістэмы надзвычайных сітуацый і грамадзянскай абароны Капыльскага РАНС Мікалай Кір'яцкі. - Нашы супрацоўнікі ў спякотныя дні практычна штодня выязджаюць і правяраюць, як часта людзі, на свой страх і рызыку, парушаюць забарону. У мінулыя выхадныя стаяла спякотнае надвор'е. Людзі купаліся. Асабліва шмат адпачываючых было на вадаёме ў вёсцы Смолічы. Мы стараліся як мага большай колькасці чалавек данесці інфармацыю, расказаць, якія небяспекі тоіць у сабе недаследаванае возера. Людзі ў нецвярозым стане - асаблівая катэгорыя. Гэта першыя кандыдаты на папаўненне трагічнай статыстыкі АСВОД. Нажаль, бываюць і такія. Ужыванне алкаголю цягне на подзвігі, якія нярэдка заканчваюцца вельмі сумна.
■ Мікалай Кір'яцкі тлумачыць, што купацца ў забароненых месцах небяспечна
Якая сітуацыя ў буднія дні? Высвятляем. Пільную ўвагу будзем звяртаць на непаўналетніх дзяцей, якія знаходзяцца ля вады без суправаджэння дарослых. Калі такія знойдуцца, канешне.
Наш першы аб'ект — вадаём каля вёскі Стары Капыль. Сітуацыя парадавала: ціхую водную роўнядзь парушалі толькі невялікія хвалі ад лёгкіх лапак вадамерак ды дробная рыбка, якая часам выскоквала з вады. Падобная карціна назіралася і на вадаёмах у Дусаеўшчыне і Усава.
Невялікая сажалка ў аграгарадку Скабін, якая ў народзе завецца «перцаўскае возера», карыстаецца папулярнасцю ў жыхароў бліжэйшых населеных пунктаў. Аднак і там нікога не было.
Наступнае на шляху — возера ў аграгарадку Мажа. Тут сустракаем пажылога чалавека з двума ўнукамі. Малодшы ў ваду не палез, ціхенька сядзеў на беразе. А старэйшая дзяўчынка купалася ў возеры. Праўда, зусім блізка ад берага і пад чулым наглядам дзядулі. Убачыўшы спецмашыну РАНС, адпачываючыя выходзяць з вады. Мікалай Кір'яцкі ўручае купальшчыкам наглядна-выяўленчую прадукцыю і расказвае, чаму небяспечна лезці ў ваду ў неабсталяваных месцах. Пасля размовы людзі згаджаюцца з'ехаць дадому.
На супрацьлеглым беразе вадаёма ў Мажы віднеецца машына і лодка. Пад'язджаем туды. Аказалася, гэта рыбакі. Хоць мужчыны і не купаліся, але лішні раз успомніць правілы бяспекі не перашкодзіць. Мікалай Кір'яцкі і ім уручае ўлёткі.
■ Вадаём у Комсічах
У той дзень мы пабывалі і на сумна вядомым вадаёме каля вёскі Комсічы. Вакол - ні душы, толькі магутны шум дамбы рэзка парушае цішыню, заглушаючы спевы птушак і стракатанне конікаў. Месца, вядома, прыгожае, ды і возера ўражвае сваімі памерамі і краявідамі. Аднак зірнеш - і становіцца зразумела: вадой тут лепш любавацца з берага.