Як сцвярджае камандзір студатрада «Агеньчык» з ААТ «Семежава», студэнтка 1 курса БДУ Аляксандра Скамароха, гэты від працы дапамагае не толькі зарабіць, але і выдатна правесці час.
«АГЕНЬЧЫК»
- Узначаліць атрад мне прапанавала намеснік дырэктара па выхаваўчай рабоце Семежаўскага КПК д/с - СШ Наталля Горбач, - кажа Аляксандра. - Адразу пагадзілася, бо ў шэрагі атрада ўвайшлі ўсе знаёмыя хлопцы са школы, у якой я вучылася раней. Пасля года вучобы ў БДУ, вядома ж, сумую па знаёмых людзях, а гэта выдатная нагода сумясціць прыемнае з карысным - папрацаваць і пагутарыць.
У склад атрада ўвайшлі 4 хлопцы і 6 дзяўчат з Семежаўскага КПК д/с – СШ. Задача ва ўсіх адна - прыбраць тэрыторыю на першым і другім складах ААТ «Семежава», падрыхтоўваючы памяшканні да ўборачнай кампаніі.
■ Удзельнікі студатрада «Агеньчык»
Навучэнец 10 класа Яўген Сафронаў дадаў, што ў дзень даводзіцца працаваць па 4 гадзіны. Рабятам выдалі спецвопратку, у якой яны працуюць, і інвентар, а перад пачаткам працы абавязкова з самай раніцы праводзяцца інструктажы па тэхніцы бяспекі.
Спецыяліст па ідэалагічнай рабоце ААТ «Семежава» Анастасія Кунгурава адзначыла, што хлопцы пачалі работу 27 чэрвеня і за гэты час зарэкамендавалі сябе як адказныя і дысцыплінаваныя навучэнцы, якія якасна выконваюць работу.
Загадчыца склада №1 ААТ «Семежава» Святлана Кулік дадала, што на тэрыторыі склада з моманту прыходу вельмі весела і пазітыўна, бо яны спяваюць і танчаць, тым самым разбаўляючы новымі фарбамі паўсядзённы побыт працоўных гаспадаркі.
«РЫТМ»
У скверы каля поймы ракі Мажа г. Капыля з самай раніцы кіпіць праца. Студатрад «РЫТМ» на чале з камандзірам атрада Ірынай Сташэўскай прыбірае скошаную траву.
- Зусім нядаўна мы прыступілі да працы, - кажа Ірына Анатольеўна. - У склад увайшлі таксама 9 актыўных і мэтанакіраваных рабят. Перад намі пастаўлены задачы, накіраваныя асабліва на добраўпарадкаванне горада Капыля: праполка кветнікаў, уборка скошанай травы, сухіх галінак і іншыя.
■ Студатрад «Рытм» працуе каля поймы ракі Мажа
- Чым заняць сябе летам з карысцю? - пытаецца навучэнец 9 «А» класа СШ № 2 г. Капыля Захар Ярэц. - Адказ відавочны - пайсці працаваць, мець зносіны з сябрамі і зарабіць грошы для набыцця каштоўнай рэчы.
– Студатрад – гэта не толькі наша занятасць, – дадае навучэнка 10 «А» класа СШ №2 г. Капыля Ксенія Грыцэвіч. – Гэта найперш прыемнае баўленне часу і новыя знаёмствы.
– Штогод у шэрагі студатрадаў, безумоўна, уваходзяць дзеці, якія жадаюць працаваць, – гаворыць першы сакратар РК ГА «БРСМ» Анастасія Збіруховіч. - Угаворваць нікога не даводзіцца, кожны з іх ведае, што такое праца. Усе яны адказна падыходзяць да пастаўленых задач. Бо кожны разумее, што набывае бясцэнны досвед, які спатрэбіцца ў жыцці. У гэтым годзе РК ГА «БРСМ» працаўладкуе каля 90 хлопчыкаў і дзяўчынак ва ўзросце 14-17 гадоў.
Наталля ДАВЫДЗЕНКА