Штогод перад новым навучальным годам у нашай краіне шматдзетныя сем'і, у якіх выхоўваюцца дзеці школьнага ўзросту, могуць разлічваць на дапамогу ў іх падрыхтоўцы да школы з боку дзяржавы, прафсаюзаў і працадаўцаў.
Аб памеры выплат і парадку іх атрымання расказвае загадчык аддзялення сацыяльнай адаптацыі і рэабілітацыі Капыльскага ТЦСАН Ганна Кільчэўская:
— У адпаведнасці з падпраграмай 1 «Сям'я і дзяцінства» Дзяржаўнай праграмы «Здароўе народа і дэмаграфічная бяспека Рэспублікі Беларусь» на 2021-2025 гады, зацверджанай пастановай Савета Міністраў Рэспублікі Беларусь №28 ад 19.01.2021 г., з 1 жніўня 2022 г. будзе рабіцца выплата аднаразовай матэрыяльнай дапамогі да навучальнага года. Атрымаць яе могуць шматдзетныя сем'і на кожнага навучэнца, які навучаецца ва ўстановах агульнай сярэдняй і спецыяльнай адукацыі (на ўзроўні агульнай сярэдняй адукацыі) у Рэспубліцы Беларусь. Памер дапамогі - 30% бюджэту пражытачнага мінімуму ў сярэднім на душу насельніцтва, які дзейнічае на 1 жніўня каляндарнага года. Выплата не ажыццяўляецца на дзяцей, якія навучаюцца ў прафесійна-тэхнічных, вышэйшых і сярэдніх спецыяльных навучальных установах.
Матэрыяльная дапамога аказваецца па месцы жыхарства (месцы знаходжання) аднаго з бацькоў дзіцяці або па месцы вучобы дзіцяці.
У ДУ «Капыльскі ТЦСАН» ужо распачаты збор дакументаў для выплаты матэрыяльнай дапамогі да новага навучальнага года. Пры падачы заявы прадастаўляюцца наступныя дакументы: пашпарт аднаго з бацькоў, даведка з устаноў адукацыі аб навучанні дзяцей, пасведчанне шматдзетнай сям'і, даведка аб месцы жыхарства і аб складзе сям'і, разліковы рахунак у ААТ «ААБ Беларусбанк».
У першым этапе яе атрымаюць 390 сем'яў, у якіх выхоўваюцца 822 школьнікі. Другі этап выплат будзе ажыццёўлены ў жніўні бягучага года.
Каб атрымаць аднаразовую матэрыяльную дапамогу, шматдзетныя сем'і павінны звярнуцца ў ДУ «Капыльскі ТЦСАН» па адрасе: г. Капыль, вул. 50 гадоў БССР, д. 16а, тэл.: 51-4-00, 51-4-01, 26-2-45.
Падрыхтавала Крысціна ЖОГАЛЬ
