На базе гаспадаркі прайшла практычная частка выязнога пасяджэння Прэзідыума Мінскага абласнога камітэта прафсаюза работнікаў АПК. Прафсаюзныя лідэры аграрнай галіны з усяго цэнтральнага рэгіёну на чале са старшынёй Мінскага абласнога камітэта прафсаюза работнікаў АПК Міхаілам Бодай наведалі мехдвор філіяла «Лакнея».
— Сёння ў цэнтры ўвагі — уборачная кампанія, таму яшчэ раз пагаворым пра алгарытм дзеянняў раённых і першасных прафсаюзных арганізацый падчас гарачай пары. Асабліва гэта актуальна для тых лідэраў, у каго цяперашняе жніво - першае ў прафесійнай дзейнасці, - падкрэсліў старшыня Мінскага абласнога камітэта прафсаюза работнікаў АПК Міхаіл Бода. — Спадзяюся, сёлета мы годна выканаем пастаўленыя перад намі задачы.
■ Міхаіл Бода і іншыя ўдзельнікі семінара ўважліва слухаюць інжынера па ахове працы сельгаспрадпрыемства Сяргея Сыса
Аб рабоце сельгаспрадпрыемства, яго задачах і развіцці расказаў дырэктар філіяла «Лакнея» Пётр Юхо. Гаспадарка налічвае каля 6,8 тыс. га сельгасугоддзяў і 5,5 тыс. га ворыва. Пагалоўе буйной рагатай жывёлы - 6200 галоў, дойнага статка - 1770 галоў. Асноўны напрамак - вытворчасць малака і мяса, сярэднесутачны надой ад адной каровы сёння складае 22,5 літра.
Аб тым, як арганізаваны ўмовы працы і налічваецца заработная плата, расказалі адказныя спецыялісты сельгаспрадпрыемства. Працаўнікі ф-ла «Лакнея» ў поўным аб'ёме забяспечаны ўсім, што неабходна для стварэння бяспечнай і камфортнай працы.
■ Пётр Юхо (у цэнтры) з супрацоўнікамі распавядае пра працу сталовай
Прысутным былі прадэманстраваны спецвопратка і абутак, якія выкарыстоўваюцца ў гаспадарцы, а таксама вогнетушыцелі, аптэчкі і ўсе астатнія інструменты, якія ў абавязковым парадку павінны быць у кожнай адзінцы тэхнікі, задзейнічанай на жніве.
Распавялі і паказалі, як арганізаваны санітарна-бытавыя ўмовы. Так, на мехдвары ёсць утульны пакой для прыёму ежы, дзе маюцца сталы, крэслы, мікрахвалёўка, электрачайнік і посуд. Любы працаўнік тут можа з камфортам паабедаць ці павячэраць. Побач - камфартабельная і чыстая распранальня з індывідуальнымі шафкамі. А пасля напружанага працоўнага дня механізатары могуць памыцца ў душы, дзе штодзень ёсць гарачая вада.
Не абышлі ўвагай і працу сталовай, бо сытныя абеды адыгрываюць ключавую ролю ў любой сельскагаспадарчай кампаніі. Гэта асабліва актуальна ў тыя перыяды, калі працаўнікі з раніцы да позняга вечара занятыя на палявых работах. У ф-ле «Лакнея» ёсць свая сталовая, дзе імкнуцца распрацаваць смачнае і разнастайнае меню. Гарачыя абед і вячэра ў суме каштуюць ад 8 да 9 рублёў, работнікі кампенсуюць толькі 25% ад агульнага кошту.
Надалі ўвагу і таму, як арганізавана дзейнасць моладзі, якая працуе ў гаспадарцы ў перыяд летніх канікул: як правіла, непаўналетнія занятыя на зернесушыльных комплексах і працуюць па дамове падраду.
Прафсаюзныя лідэры змаглі пераняць досвед вядзення інфармацыйных стэндаў у дыспетчарскай, а таксама паглядзець, як праводзіцца перадрэйсавы агляд механізатараў і кіроўцаў. І нават праверыць спраўнасць алкатэстэра. Што і зрабіў тэхнічны інспектар Мінскай абласной арганізацыі прафсаюза работнікаў АПК Аляксандр Мотуз.
■ Аляксандр Мотуз правярае працу алкатэстэра
Падчас выязнога паседжання апроч практычнага семінара ў ф-ле «Лакнея» ўдзельнікі мерапрыемства наведалі таксама Капыльскі раённы краязнаўчы музей. Пазнаёміліся са старажытнай гісторыяй раёна і папулярнай сёння выставай «Генацыд - злачынства без тэрміна даўнасці». Пабывалі ў сядзібе «Мядовая заімка» Капыльскага дзяржаўнага каледжа, якая знаходзіцца ў вёсцы Усава.
■ Падчас наведвання выставы ў Капыльскім раённым краязнаўчым музеі
Завяршылася мерапрыемства пленарным пасяджэннем, падчас якога была дадзена ацэнка працы Капыльскага раённага камітэта прафсаюза работнікаў аграпрамысловага комплексу.
Крысціна ЖАГОЛЬ