Працаўнікі ААТ «Піянер-Агра» і «Старыца-Агра» як ніхто іншы ведаюць, што будучы ўраджай шмат у чым залежыць ад таго, наколькі эфектыўна і своечасова будуць праведзены палявыя работы, таму і працуюць, не пакладаючы рук. Ды і перамогі ў перыяды пасяўной і ўборачнай для іх - звыклая справа. Паціскаючы рукі героям палёў і перадаючы ім заслужаныя ўзнагароды, прафзвязныя лідэры пажадалі аграрыям наступных працоўных дасягненняў.
— Толькі адказныя і дысцыплінаваныя работнікі па-сапраўднаму ведаюць, якую каласальную працу трэба ўкласці ў агульны бохан. Упэўнены, што з такімі работнікамі як вы, засекі рэспублікі папоўняцца яшчэ не адной тысячай тон новага ўраджаю, — павіншаваў перадавікоў уборачнай старшыня Рэспубліканскага камітэта Беларускага прафесійнага саюза работнікаў аграпрамысловага комплекса Васіль Хвацік.
У сваю чаргу старшыня абласнога камітэта Беларускага прафсаюза работнікаў АПК Міхаіл Бода акцэнтаваў увагу на тым, што ў сельгаспрадпрыемствах прывыклі думаць не толькі аб тэмпах работ, але і аб якасці. Значыць, прыбіраюць хутка і з мінімальнымі стратамі. Таму, мяркуючы па ўсім, і выбіліся ў лідэры аднымі з першых на Капыльшчыне.
Сярод тых, хто атрымаў у гэты дзень Падзякі Рэспубліканскага камітэта Беларускага прафесійнага саюза работнікаў АПК, трактарысты-машыністы ААТ «Піянер-Агра» Валерый і Міхаіл Мароз, галоўны аграном сельгаспрадпрыемства Сяргей Гурын, а таксама трактарысты-машыністы ААТ «Старыца-Агра» Сяргей Стрэліцкі, Аляксандр Сваткоўскі і кухар Алена Гук.
Наступныя героі дня адзначаны Падзячнымі лістамі Мінскага абкама прафсаюза работнікаў АПК. Сярод узнагароджаных — трактарысты-машыністы Мікалай Сцепчук, Аляксандр Навіцкі, Уладзімір Логман, Аляксандр Бохан, кіроўцы Валерый Захарчэня і Сяргей Мысліцкі. Усе перадавікі жніва не засталіся без увагі старшыні Капыльскага райкама прафсаюза работнікаў АПК Ірыны Сцяпура і кіраўніцтва сельгаспрадпрыемстваў.
У працоўнай біяграфіі старшага камбайнёра ААТ «Піянер-Агра» Мікалая Сцепчука колькасць уборачных кампаній налічвае чатыры. Мужчына ўжо доўгі час працуе ў сферы сельскай гаспадаркі. Прызнаецца, што працоўны дзень аграрыя пачынаецца раніцай і заканчваецца разам са светлавым днём — трэба ўсё паспець, даглядзець, зрабіць па-гаспадарску.
— Працаваць адно задавальненне! У прафесію прыйшоў па шляху бацькі, той быў механізатарам, - распавядае мужчына. Галоўнае для нас - своечасова ўбраць ураджай і адправіць у засекі.
Яго памочнік Аляксандр Навіцкі прызнаецца, што прафесію абраў свядома і мэтанакіравана.
— Люблю сваю працу,— кажа камбайнер. - Складанасцяў няма: тэхніка выдатная, разумеючае кіраўніцтва, зладжаны экiпаж. Галоўнае — не страціць ніводнай пагодлівай гадзіны. А атрыманая ўзнагарода - гэта стымул для новых перамог!
Таццяна Бохан
Крыніца «СП»