Па гэтым пытанні - у падрабязным каментары начальніка аддзялення ДАІ Капыльскага РАУС Віктара Борыса:
– Пасведчанне кіроўцы ў Беларусі выдаецца на 10 гадоў. Як толькі тэрмін дзеяння дакумента падыходзіць да канца, яго неабходна замяніць. Калі кіроўца ўвесь час карыстаецца аўтамабілем, то не трэба чакаць апошняга дня канчатку тэрміна дзеяння паказанага ў пасведчанні. Мы настойліва раім загадзя вырашыць гэта не такое ўжо і складанае пытанне, каб у далейшым пазбегнуць непрыемнасцяў. Калі тэрмін дзеяння вадзіцельскага пасведчання скончыўся, то ў такім выпадку чалавек лічыцца не маючым правы кіравання, і кіраваць транспартным сродкам катэгарычна забараняецца.
У адпаведнасці з законам, калі будзе выяўлены факт, што грамадзянін знаходзіцца за рулём аўто з пратэрмінаванымі правамі, то надыходзіць адміністрацыйная адказнасць. Гэта прыраўноўваецца да таго, што вы кіруеце без правоў. Кодэксам Рэспублікі Беларусь аб адміністрацыйных правапарушэннях прадугледжана адказнасць за кіраванне транспартным сродкам асобай, якая не мае права кіравання. Такое парушэнне адносіцца да грубых. У першы раз (ч.1 арт.18.14 КоАП) памер штрафу складзе ад 5 БВ да 20 БВ, у другі раз на працягу года пасля першага парушэння (ч.2 арт.18.14 КоАП) - ад 20 БВ да 50 БВ.
З 2021 года за неаднаразовае кіраванне транспартным сродкам чалавекам, які не мае права кіравання (тры і больш разы на працягу года чалавек прыцягваўся да адказнасці за кіраванне транспартным сродкам без права кіравання), уведзена крымінальная адказнасць.
Што тычыцца так званых бестэрміновых правоў узору Міністэрства ўнутраных спраў СССР, то іх таксама лепш памяняць. Яны ёсць сёння ў краіне і даюць поўнае права на кіраванне транспартным сродкам. Але мы рэкамендуем такія пасведчанні мяняць. Знешнасць чалавека, які атрымліваў дакумент часам 30 гадоў таму, даволі часта не адпавядае таму, як ён выглядае зараз. Нярэдка інспектару складана вызначыць па такіх старых фота ў дакументах іх сапраўднага ўладальніка, адпаведна час праверкі на дарозе зацягваецца. А гэта ўжо пэўныя нязручнасці (у першую чаргу для ўладальніка такіх правоў), якіх можна пазбегнуць. За межы Рэспублікі Беларусь з такімі правамі выязджаць нельга - яны не прызнаюцца ў іншых краінах, нават у Расійскай Федэрацыі.
Павел Шэін
«СП»
