Разам з Валожынскім і Стаўбцоўскім раёнамі Мінскай вобласці былі прадстаўлены арганізацыі, прадпрыемствы і ўстановы Капыльшчыны.
Гарачая субота не перашкодзіла гасцям свята правесці свой вольны час у прыемнай атмасферы - менавіта яе і стваралі капыляне. Так, на пачатку тэрыторыі каля комплексу размясціўся павільён філіяла РУП «Белпошта», дзе быў прадэманстраваны дадатак AR MARKA BELARUS, тэматычная фотазона, а таксама дзіцячая зона з пазламі, размалёўкамі і паштовым лабірынтам.
Цікава было паглядзець на выставу «Ваенны шпіталь» Капыльскай ЦРБ, дзе была прадстаўлена палатка з неабходнымі медыцынскімі прыборамі і сродкамі.
Пазнавальныя прэзентацыі падрыхтавала ўпраўленне па адукацыі, спорце і турызме райвыканкама: установы адукацыі раёна расказвалі пра сваю гісторыю, вядомых выпускнікоў, навучальныя праекты і многае іншае.
Займальнай стала пляцоўка і са спілс-картамі ад РК ГА «БРСМ», дзе любы ахвочы змог з мазаікі правільна скласці карту Беларусі па раёнах. Не менш цікавым стала і правядзенне акцыі «Роднае-народнае» і гульні «Гарадкі».
Майстры Капыльшчыны яскрава прадставілі свой раён на Кургане Славы. Тут размясцілася выстава работ навучэнцаў школы мастацтваў «Традыцыйныя рамёствы роднага краю». Былі арганізаваны выстава-продаж раённага цэнтра традыцыйнай культуры, майстар-клас па вырабе кветак Перамогі з ізалону. Ткачыхі з Семежаўскага раённага цэнтра ткацтва праводзілі майстар-класы па ткацтве і пляценні пояса.
Раённы краязнаўчы музей прадставіў экспазіцыю «Вайна. Перамога. Памяць», прысвечаную Году гістарычнай памяці. Тут паказалі экспанаты ваеннай тэматыкі, а таксама дакументы і фота аб гісторыі Вялікай Айчыннай у раёне.
Паспрабаваць розныя прысмакі ўласнай вытворчасці прапаноўваў павільён Капыльскага райспажыўтаварыства, дзе можна было набыць прадукцыю.
Не засталіся ўбаку і вытворчыя прадпрыемствы. Так, вельмі паказальна выступілі КУП «Капыльская ЖКГ» і філіял КУП «Мінскаблдарбуд» — «ДРБУ №124». ЖКГ прапанавала выставу з драўляных дрэў і дэкаратыўных гаршкоў для кветак. А дарожная служба – мініяцюрныя машыны-грузавікі з прадукцыяй уласнай вытворчасці: жвір, друз жвіровы, асфальтабетон, аўтапавільён і шматлікае іншае.
У капыльскіх палатак было нямала гасцей. Напрыклад, Валянціна з Мінска прыязджае сюды не першы раз і заўсёды атрымлівае шмат эмоцый ад мерапрыемства. На гэты раз яна наведала палатку КСУП «Дактаровічы», дзе работнікі прадпрыемства на сваім падворку прапаноўвалі смачныя пачастункі.
Добры настрой на працягу ўсяго выставачнага дня дарылі работнікі культуры раёна. На імправізаванай сцэне сярод розных артыстаў Мінскай вобласці выступалі і самадзейныя артысты раённага цэнтра культуры.
Павел Шэін
Другі дзень выставы-прэзентацыі Капыльскага раёна на мемарыяльным комплексе «Курган Славы» прайшоў не менш цікава і займальна. Нягледзячы на стыхію, якая разбушавалася напярэдадні, гледачоў таксама было нямала.
У нядзелю творчую выставу прадстаўляла раённая газета «Слава працы»: ад «Калгасніка Капыльшчыны» да дня сённяшняга». Наведвальнікаў вельмі цікавілі прадстаўленыя экспанаты: копія газеты «Калгаснік Капыльшчыны» за 9 мая 1945 года, юнае пакаленне – друкуючая рэтра-машынка, папярэднік камп'ютарнай клавіятуры, плёнкавыя фотаапараты і аксесуары да іх розных гадоў выпуску. Зазіралі да нас і тыя, для каго Капыльшчына з'яўляецца малой радзімай іх бацькоў ці дзядуль і бабуль.
Пашанцавала нам і з суседзямі. Думаю, многія надоўга запомняць «цётку Олю з Быстрыцы» (спецыяліста па ідэалагічнай працы з ААТ «Ціміразеўскі» Вольгу Кукрэш) і яе калег, якія шчодра частавалі ўсякімі смачнасцямі ўсіх, хто праходзіў міма, асабліва дзяцей і вайскоўцаў. Тут жа, на міні-сядзібе, можна было адлюстраваць сябе на дзвюх фотазонах, якія дэманстравалі багацце беларускай вёскі.
А яшчэ нашымі суседзямі быў Капыльскі кааппрам, дзе можна было прадэгуставаць прадукцыю, набыць паўфабрыкаты і гатовыя вырабы. Як адзначыла дырэктар прадпрыемства Тамара Абрамовіч, назіраўся пастаянны попыт з-за якасці і прымальнай цаны.
Выбудоўваліся чэргі і ля павільёна Капыльскага філіяла ААТ «Слуцкі сыраробны камбінат». Многія, асабліва прадэгуставаўшы прапанаванае, раскуплялі сыры «Пармезан», «Пане Каханку», «Капыльскае золата» і іншыя. А астудзіцца можна было марожаным, якое вырабляюць іх калегі са Старых Дарог.
Цікавасць выклікала і экспазіцыя Капыльскага дзяржаўнага каледжа. На ёй былі прадстаўлены швейныя вырабы і пчалапрадукцыя з сядзібы «Мядовая заімка», а таксама праводзіўся майстар-клас па ферментацыі гарбаты з лекавых траў.
На вачах публікі рабілі альтанку майстры Капыльскага рамонтна-будаўнічага ўчастка. Тутака ж можна было ўбачыць і выставу некаторых будаўнічых прылад.
З паслугамі, якія прадстаўляюцца «Белтэлекамам», знаёмілі прадстаўнікі Капыльскага філіяла.
Установы адукацыі і культуры прапаноўвалі выставы, прысвечаныя Году гістарычнай памяці. Напрыклад, бібліятэчныя работнікі запрашалі прыняць удзел у інтэлектуальным лато «Каб памяталі», тэматычную канцэртную праграму падрыхтавала Дзіцячая школа мастацтваў.
Капыльскі ТЦСАН сумесна з раённай арганізацыяй Беларускага саюза жанчын прадстаўляў сваю прадукцыю, прапаноўваў зрабіць здымак на памяць у фотазонах.
Члены арганізацый райкама прафсаюза работнікаў адукацыі і навукі расказвалі пра сваю дзейнасць, запрашалі прыняць удзел у гульнях і віктарынах.
Наведвальнікі прэзентацыі давалі высокую адзнаку ўзроўню арганізацыі мерапрыемства. Напрыклад, маці Наталля з пяцімесячнай дачкой на руках адзначыла:
— Мы жывем побач з мемарыяльным комплексам у в. Лужкі, але на такое свята трапілі ўпершыню. Даведаліся ад суседкі, што тут адбываецца. І вось усёй сям'ёй вырашылі наведаць. Эмоцыі перапаўняюць. Дзякуем капылянам за такую гасціннасць, асабліва ААТ «Ціміразеўскі». Гэта вельмі карыснае баўленне часу.
Кацярына з Мінска з дзецьмі Кірылам і Аляксандрай таксама вырашылі правесці выхадны дзень на Кургане Славы.
— Мы не ведалі, што тут ужо некалькі месяцаў адбываецца такое дзейства. Думалі проста наведаць мемарыял, а тут сапраўднае свята! Мы даведаліся вельмі шмат пра ваш капыльскі край. Дзякуй!
Сяргей КОЗЕЛ
Крыніца «СП»
