За 7 месяцаў б.г. на тэрыторыі Мінскай вобласці зарэгістравана 84 ДТЗ з удзелам пешаходаў, у якіх 24 чалавекі загінулі і 60 пешаходаў атрымалі траўмы, 13 з якіх непаўналетнія. Па віне саміх жа пешаходаў адбылося 39 ДТЗ, дзе 16 чалавек загінулі, 23 - траўміраваны.
З мэтай папярэджання ДТЗ з удзелам пешаходаў з 12 па 14 жніўня б.г. Дзяржаўтаінспекцыя Мінскай вобласці праводзіць прафілактычную акцыю «Пешаход». Падчас штодзённых рэйдаў ДАІ адпрацуе месцы канцэнтрацыі ДТЗ, а таксама аварыйна-небяспечныя ўчасткі аўтамабільных дарог і вуліц населеных пунктаў, найбольш схільных да рызыкі ўчынення наездаў на пешаходаў. Вартавыя дарог звернуць увагу на выяўленне парушэнняў з боку пешаходаў, якія ігнаруюць ПДР, а таксама пракантралююць выкананне вадзіцелямі транспартных сродкаў правілаў праезду пешаходных пераходаў, якія не рэгулююцца. Дарэчы, на пешаходных пераходах за названы перыяд адбылося 28 ДТЗ, у якіх 3 чалавекі загінулі, 25 - атрымалі траўмы рознай ступені цяжкасці.
Фармальна ў пешаходаў ёсць перавага на пешаходным пераходзе, але гэта не азначае, што трэба смела ступаць на «зебру», не агледзеўшыся па баках. З самага ранняга дзяцінства нас вучаць: спачатку паглядзіце налева, затым направа - і толькі пасля гэтага можна ісці.
Паважаныя пешаходы! Ідэальны варыянт - калі вы можаце сустрэцца поглядам з кіроўцам аўтамабіля, які набліжаецца да пераходу. Па поглядзе або па жэсту рукі вы зразумееце, прапусціць ён вас ці не. Псіхолагі лічаць, што чалавек, які не збіраецца прапусціць пешахода, выглядае напружана ці наўмысна адводзіць позірк. У такім выпадку бяспечней перачакаць на тратуары.
Кіроўцам трэба памятаць, што дзеянні пешаходаў часам непрадказальныя, таму ехаць неабходна асцярожна. Заўсёды трэба быць гатовым затармазіць у любы момант. У цёмны час сутак пры праездзе населенага пункта трэба максімальна знізіць хуткасць, а перад пешаходным пераходам - аж да прыпынку. Праязджаць пешаходны пераход трэба толькі пры поўнай упэўненасці, што пешаходы вас бачаць і прапускаюць.
Дзяржаўтаінспекцыя звяртаецца да ўсіх удзельнікаў дарожнага руху: калі вы бачыце паблізу праезнай часткі пешахода (веласіпедыста), які знаходзіцца з характэрнымі прыкметамі ап'янення, які відавочна ўяўляе небяспеку для руху, просім вас неадкладна паведамляць у дзяжурную частку ДАІ Мінскай вобласці па тэлефоне 4-2 44, альбо на тэлефонную лінію 102.
УДАІ УУС Мінскага аблвыканкама.
