Па словах першага сакратара РК ГА «БРСМ» Анастасіі Збіруховіч, сумясціць адпачынак з працай і пры гэтым зарабіць грошы ўжо мелі магчымасць каля 50 юнакоў і дзяўчат нашага рэгіёна: у рамках трэцяга працоўнага семестра адпрацавала пяць студэнцкіх атрадаў.
А зараз яшчэ 12 маладых людзей Капыльшчыны працуюць у студатрадах, створаных на базе ААТ «Прэснакі» і «Прагрэс 2010». Кожны атрад працуе па 10 працоўных дзён.
Прафесія знутры
Разам з камандзірам атрада «Каласок» ААТ «Прагрэс 2010» Аленай Астроўскай працуюць яшчэ пяць хлопцаў — навучэнцы гарадскіх школ Паліна Бохан, Марыя Салавей і Уладзіслаў Раеўскі, а таксама навучэнцы Пацейкаўскай СШ Іван Астроўскі і Капыльскага дзяржаўнага каледжа Кацярына Лабацэвіч.
— Я ўжо чацвёрты год праводжу тут працоўнае лета, — дзеліцца ўражаннямі Алена Астроўская. - Склад нашага атрада падабраўся дружны. Рабяты працавітыя, усё адзін аднаму дапамагаюць, таму прыемна працаваць з такой камандай. Аб'ём работ стандартны: уборка тэрыторыі каля КЗС, паветраная сушка збожжа і іншыя пасільныя заданні. У гэтым годзе разам са мной працуе і мой брат Іван. Лічу, што студэнцкія атрады - гэта не толькі гарантаваная занятасць, магчымасць атрымаць працоўныя навыкі, але і спосаб даведацца кошт грашай, а таксама накіраваць сваю энергію ў патрэбнае рэчышча. Асаблівыя словы падзякі ад асобы ўсіх членаў студатрада хочацца выказаць дырэктару сельгаспрадпрыемства Валерыю Тароцька за тое, што ён заўсёды маладым людзям дае магчымасць падзарабіць летам.
У «Іскры» — толькі хлопцы
Такую ж зладжаную працу маладых людзей пад чулым наглядам загадчыка збожжатока Вольгі Рабко убачылі на КЗС «Камень». У атрадзе «Іскра» - шэсць хлопцаў. Усе малайцы, што ні даручыш - выконваюць добрасумленна.
— У нашай гаспадарцы студатрады працуюць ужо трэці сезон, — уводзіць у курс справы Вольга Анатольеўна. - Узрост рабят - ад 16 да 18 гадоў. Працуюць пяць дзён у тыдзень па сем гадзін з перапынкам на абед. Усе яны забяспечаны спецвопраткай і пітной вадой. Перад зменай - абавязковы інструктаж па ахове працы. Затым — уборка тэрыторыі КЗС, а пасля — калі вялікагрузныя МАЗы дадаюць залатыя «барханы» збожжа пры разгрузцы і як толькі ад'ехала тэхніка, юныя КЗСаўцы з рыдлёўкамі і венікамі бяруцца за працу: разраўноўваюць насыпы і абкідаюць іх па баках.
— Сёлета вырашыў далучыцца да студатрадаўскага руху, — гаворыць камандзір Юрый Гаўрыловіч. — Сам я вучуся на тэхніка-механіка ў Мар'інагорскім дзяржаўным аграрна-тэхнічным каледжы. У нас вельмі добры атрад, кожны любіць сваю працу. Лічу, што праца ў атрадах дысцыплінуе і паказвае, што для дасягнення поспеху трэба прыкласці намаганні. А заробленыя грашовыя сродкі планую патраціць на зборы да вучобы ў каледжы.
— Далучыцца да студатрада прапанавалі яшчэ ў школе, — уступае ў размову Ягор Бабёр. - Мне адразу спадабалася гэта ідэя. Чаму б не? Вырашыў, што зараблю ўласныя грошы. Гэта мой ужо другі сезон. Хлопцы добрыя, дружныя, разам нянудна, бо побач са мной працуюць мае сябры і аднакласнікі. Зарплату патрачу на вучобу ў Беларускай дзяржаўнай акадэміі сувязі.
Таццяна Бохан
Крыніца «СП»