Героем дня на Капыльшчыне стаў аператар зернесушыльнага комплекса Мікалай Бабко, які не толькі працуе настаўнікам фізічнай культуры і здароўя Жыліхаўскага КПК дзіцячы садок – сярэдняя школа, але і з'яўляецца прафсаюзным лідэрам мясцовай пярвічкі.
— На зернесушыльным комплексе працую ўжо 11 сезон, а да гэтага года чатыры быў памочнікам камбайнера, — уводзіць у курс справы Мікалай Фёдаравіч. — Сам я вырас у вёсцы, ведаю цану хлеба, таму і стараюся свой водпуск правесці з карысцю. Усе нашы намаганні накіраваны на перапрацоўку збожжа: яго ачыстку, сушку, сартаванне і г.д. За дзень праз сушылку прапускаецца ад 160 да 400 тон новага ўраджаю. Атрыманая ўзнагарода — стымул працаваць яшчэ лепш, прыемна, калі твая праца адзначана.
Многія з педагогаў не першы год прымаюць удзел у жніве, расказвае старшыня Мінскай абласной арганізацыі Беларускага прафесійнага саюза работнікаў адукацыі і навукі Таццяна Апраніч:
— У гэтым годзе 49 чалавек з 16 раёнаў удзельнічаюць ва ўборачнай кампаніі. Для нас гэта настолькі прыемна і ганарова, таму што мы рэальна разумеем, што чалавек, не гледзячы на тое, ці з'яўляецца ён дырэктарам установы адукацыі, настаўнікам фізкультуры, старшынёй першаснай прафсаюзнай арганізацыі або працоўным па комплексным абслугоўванні будынкаў і збудаванняў, ён робіць самую галоўную справу - прыбірае наш агульны ўраджай, збірае наша народнае золата пад назвай збожжа. І калі мы прыехалі ў ЗАТ «Жыліхава» - гэта ветраны настрой надвор'я, равучы матор КЗС - усё рэальна наблізіла нас да рэчаіснасці, паказваючы, што праца хлебароба - ганаровая і адказная. Жнівеньская пара - яна сапраўды самая складаная для кожнага з нас. Таму што ў гэты час у школе рыхтуюцца да пачатку новага навучальнага года, а нашы сяляне збіраюць ураджай для таго, каб харчовая бяспека нашай краіны і краін-суседзяў была забяспечана.
Лідэр райкама прафсаюза работнікаў адукацыі і навукі Марына Крэпская таксама адрасавала шчырыя словы ўдзячнасці і адзначыла, што ўдарная праца хлебаробаў паслужыць прыкладам і будзе садзейнічаць умацаванню і росквіту нашай краіны. Цяпло прывітаў калег і дырэктар ЗАТ «Жыліхава» Віталь Юхо.
Не адзін сезон у шэрагу тых, хто трымае «бітву» за ўраджай, працуе ў гэтай гаспадарцы ў якасці аператара КЗС і работнік будаўнічай брыгады Сяргей Есман. Віншаванні і падарункі ён прымаў ад Капыльскага раённага аб'яднання прафсаюзаў.
- Для мяне гэта ўжо 20 сезон, мой бацька таксама працаваў на КЗС, - кажа мужчына. - Наогул, на збожжатаку склалася добрая каманда, усе ставяцца да абавязкаў адказна, а ў гарачую пару шануюць кожную хвіліну. Лічу, што да любой працы павінна ляжаць душа, тады і будзе дастойны вынік. Галоўнае зараз, каб спрыяльнае надвор'е даўжэй пратрымалася. Тады зерне з палёў будзе ісці без прыпынку. Ну а за працаўнікамі збожжатака справа не стане - давядзём яго да патрэбнай ступені захоўвання.
А галоўным падарункам для ўсіх стала выступленне акампаніятара аддзела нестацыянарнага абслугоўвання насельніцтва капыльскага раённага цэнтра культуры Антона Шышмарова.
Таццяна Бохан
Крыніца «СП»
