На пашыве пасцельнай бялізны працуюць навучэнцы Капыльскага дзяржаўнага каледжа
Сітуацыю ў Капыльскім раёне каментуе намеснік начальніка ўпраўлення па працы, занятасці і сацыяльнай абароне Капыльскага райвыканкама — начальнік аддзела занятасці Ірына ЮХО:
– Цяпер у цэлым па раёне назіраецца тэндэнцыя павелічэння попыту на працоўную сілу. Так, на 1 жніўня 2022 года ў аддзел занятасці ўпраўлення па працы, занятасці і сацыяльнай абароне райвыканкама было заяўлена 239 вакансій, у тым ліку ў горадзе - 133, у сельскай мясцовасці - 106. Каэфіцыент напружанасці па раёне складае 0,03 беспрацоўных на адну вакансію (горад - 0,02 чалавек, сяло - 0,04 чалавек).
Стабілізацыя эканомікі, павелічэнне колькасці вакантных месцаў з аднаго боку і ўзмацненне кантролю за выкананнем беспрацоўнымі сваіх абавязкаў у адпаведнасці з патрабаваннямі заканадаўства з другога боку прывялі да памяншэння працягласці беспрацоўя. Асноўная маса беспрацоўных (93 працэнты) працаўладкоўваецца на працягу аднаго месяца з моманту рэгістрацыі. На пачатак жніўня 2022 года ніводны з беспрацоўных не стаяў на ўліку звыш года.
– Давайце адзначым найбольш запатрабаваныя вакансіі.
- Спецыялісты аддзела занятасці кансультуюць грамадзян і ажыццяўляюць падбор прыдатнай работы. Пералік вакансій абнаўляецца ўвесь час. Асабліва зараз запатрабаваны прафесіі сельскагаспадарчага напрамку, прычым як па рабочых спецыяльнасцях - трактарысты, вадзіцелі, электрагазазваршчыкі, электраманцёры, аператары машыннага даення, жывёлаводы, так і кадры спецыялістаў сярэдняга і вышэйшага звяна - аграномы, ветэрынарныя ўрачы, заатэхнікі, інжынеры. У будаўнічых арганізацыях па-ранейшаму не хапае спецыялістаў па працоўных прафесіях - муляроў і бетоншчыкаў.
У сацыяльнай сферы найбольшы недахоп кадраў адчуваецца ў ахове здароўя: патрэбны ўрачы-спецыялісты практычна па ўсіх спецыяльнасцях. У той жа час вакансій сярэдняга медыцынскага і абслугоўваючага персаналу практычна няма.
– Ірына Анатольеўна, як забяспечана занятасць насельніцтва ў раёне?
- Праведзеная работа па рэалізацыі комплексу мерапрыемстваў па забеспячэнні занятасці насельніцтва дазволіла захаваць стабільную і кіруемую сітуацыю на рынку працы ў раёне. На 1 жніўня 2022 года ўзровень зарэгістраванага беспрацоўя ў цэлым роўны 0,06 працэнта да эканамічна актыўнага насельніцтва.
Таксама аддзелам занятасці прымяняюцца такія меры садзейнічання, як арганізацыя часовай занятасці моладзі. У студзені-ліпені 2022 года ў другаснай занятасці прынялі ўдзел 93 навучэнцы агульнаадукацыйных школ раёна (Старыцкай, Лясноўскай, Цімкавіцкай і СШ №2 г. Капыля), а таксама Капыльскага дзяржаўнага каледжа на пашыве пасцельнай бялізны і ручнікоў для Грозаўскага псіханеўралагічнага дома-інтэрната для састарэлых і інвалідаў, Капыльскага дома-інтэрната для састарэлых і інвалідаў, а таксама ў азеляненні тэрыторый Старыцкай, Лясноўскай, Цімкавіцкай сярэдніх школ і СШ нумар 2 г. Капыля. Выкарыстана сродкаў дзяржаўнага фонду сацыяльнай абароны насельніцтва на закуп матэрыялаў і заработную плату - 19672,70 руб.
Таксама ўпраўленне па працы, занятасці і сацыяльнай абароне Капыльскага райвыканкама дапамагае ў працаўладкаванні на новым месцы жыхарства, калі ў пошуках працы і жылля пераязджаюць з адной мясцовасці ў іншую, набыцці вопыту практычнай працы, адаптацыі інвалідаў да працоўнай дзейнасці, навучанні, перанавучанні і iншым.
Гаварыла Таццяна БОХАН
Крыніца «СП»
