У лідэрах аказваецца той, хто ўмее па-гаспадарску распараджацца зямлёй і іншымі рэсурсамі. Аб выніках уборачнай кампаніі-2022, напружаных працоўных буднях і планах на наступны год - у інтэрв'ю з першым намеснікам старшыні Капыльскага райвыканкама - начальнікам упраўлення па сельскай гаспадарцы і харчаванні Віталём Ракевічам.
— Віталь Аляксандравіч, якія стаўкі былі на сёлетнюю ўборачную кампанію?
— Вядома, кожны сезон аграрыі спадзяюцца на высокія намалоты. Але апроч выканання тэхналагічных норм і гаспадарскага падыходу да зямлі ўраджайнасць шмат у чым залежыць і ад умоў надвор'я. У гэтым годзе нягледзячы на зрушаныя тэрміны ўсіх сельскагаспадарчых работ мы атрымалі добры ўраджай.
— Падрыхтоўка тэхнікі ішла без зрываў?
- На шчасце, так. Па пастаўках запасных частак пытанняў не было. У гаспадарках мелі магчымасць весці рамонт без збояў. Хочацца адзначыць работу ААТ «Капыльскі райаграсэрвіс». Да сёлетняга сезона арганізацыя падрыхтавала да жніва 30 камбайнаў, прычым гэта быў капітальны рамонт кожнай адзінкі. Сёння ў райаграсэрвіс пачынаюць адпраўляць тыя збожжаўборачныя машыны, якія не будуць заняты на ўборцы кукурузы на зерне і якім патрабуецца рамонт. Тэхніку ўжо рыхтуюць да жніва наступнага года.
— Колькі збожжаўборачных камбайнаў удзельнічала ў жніве?
— У сельгаспрадпрыемствах раёна ёсць усяго 130 адзінак. Усе яны былі падрыхтаваны і працавалі ў полі. Ніводны камбайн не прастаяў на мехдвары.
— З якімі паказчыкамі фінішавала ўборачная кампанія гэтага года?
— Падлягала ўборцы 32 600 гектараў збожжавых і зернебабовых культур, уключаючы грэчку і проса. Валавы намалот склаў 146 000 тон, гэта плюс 14 000 тон да леташняга ўзроўню. Сярэдняя ўраджайнасць па раёне склала 46 цэнтнераў з гектара. У пачатку ўборачнай гарачай пары крыху падвяло надвор'е, выйсці ў поле перашкаджалі дажджы. Але пасля жніво набрала добры тэмп. Хлеб з палёў прыбралі без аўралаў, большая частка ўборачных дзён была сонечнай і гарачай. Таму зерне з палёў на зернесушыльныя комплексы прывозілі сухое. Яго неабходна было толькі ачысціць, засыпаць у засекі і адправіць на рэалізацыю.
— Якія цяжкасці можаце адзначыць у гэтым сезоне?
— Зрушэнне тэрмінаў уборкі прывяло да таго, што некаторыя работы прыйшлося выконваць адначасова. Напрыклад, у палях ішло поўным ходам жніво і сяўба азімага рапсу. Па-першае, узнікалі складанасці ў падрыхтоўцы глебы. Па-другое, часам востра стаяла кадравае пытанне: калі трэба было выводзіць у поле сеялкі, механізатары былі ўшчыльную заняты на жніве. Але ўсе пытанні мы вырашалі своечасова, дзякуючы чаму азімы рапс пасеяны ў тэрмін.
- Дзяржзаказ ужо выкананы ў поўным аб'ёме?
- Так, на 103%. Ва УП «Барысаўскі камбінат хлебапрадуктаў» адпраўлена 13 391 т харчовай пшаніцы, 3167 т піваварнага ячменю - у ААТ «Белсолад», 2130 т жыта - у ААТ «Мінскі камбінат хлебапрадуктаў» і ААТ «Барысаўхлебпрам» і 420 т ААТ «Мінскі камбінат хлебапрадуктаў».
— У 2022 годзе ў раёне ўвялі некалькі новых зернесушыльных комплексаў. Як яны сябе зарэкамендавалі?
— Так, гэта два комплексы ў ААТ «Піянер-Агра», «Семежава», яны на газавым паліве, трэці — у СГФ «Руднае» на вадкім. Іх увялі з самага пачатку ўборачнай кампаніі, служылі яны без збояў. Дапрацоўка збожжа ішла без праблем.
- Як прыбіраецца салома з палёў? Сёння гэта пытанне актуальнае, улічваючы, што трэба сеяць азімыя збожжавыя.
— На палях раёна працуюць 46 прэс-падборшчыкаў, якія належаць гаспадаркам, і 9 прыцягнутых. Спрэсавана 84% саломы ад агульнага аб'ёму, звезена 77% ад спрасаванай. Пытанне па ўборцы саломы з палёў сёння стаіць востра, выкананне гэтай задачы штодзень кантралюецца.
— Як спрацавала ідэалагічная служба і ці якасна прайшла ўборачная, калі глядзець з боку бытавога забеспячэння?
— У кожнай гаспадарцы было арганізавана двухразовае гарачае харчаванне, усе сталовыя правераны на выкананне санітарных норм. Па якасці харчавання сёлета пытанняў не ўзнікала. На мехдварах арганізаваны душавыя, ёсць гарачая вада. Не пакінулі без увагі і ідэалагічны бок. Рэгулярна падводзіліся вынікі, на інфармацыйных стэндах мехдвароў штодзень вывешваліся вынікі работы кожнага камбайнера і вадзіцеля, у гонар лідэраў узнімаліся флагі.
— Якія планы на наступны год?
— Павялічваем пасевы азімых збожжавых культур. У мінулым годзе азімыя ў раёне займалі 27000 га, у гэтым плошчы стануць больш на паўтары тысячы гектараў. Практычна напалову павялічацца пасевы азімага ячменю - з 2100 да 4000. Як паказвае практыка, у параўнанні з яравым ён дае ўраджай значна вышэй.
Крысціна ЖАГОЛЬ
Крыніца «СП»
