Ёсць старая добрая ісціна: узрост вызначаецца не колькасцю пражытых гадоў, а станам душы. І, безумоўна, гэта так. Пацвярджэнне таму - людзі пажылога ўзросту, якія вядуць актыўнае, творчае, напоўненае яркімі эмоцыямі жыццё. Менавіта для іх у Капыльскім ТЦСАН было арганізавана свята, прысвечанае Дню пажылога чалавека.
Праграма мерапрыемства была даволі насычанай. І пачалася яна з дыялогавай пляцоўкі.
– Вы – скарбніца мудрасці і досведу, якімі ўмела дзеліцца кожны з вас і перадае з пакалення ў пакаленне, –звярнулася да галоўных герояў сустрэчы дырэктар Капыльскага ТЦСАН Святлана Маліноўская. - Наша ўстанова працуе з падрастаючым пакаленнем і дзецьмі-сіротамі. І вы нам у гэтым актыўна дапамагаеце, расказваючы і часам настаўляючы на шлях праўдзівы.
Пажылога чалавека падмануць прасцей за ўсё. Нашы бабулі і дзядулі вельмі даверлівыя і рэдка могуць даць адпор таму, у чыіх думках пасяліўся злы намер. Таму тут вельмі дарэчны аказалася сустрэча з прадстаўнікамі служб, чый абавязак - адказнасць за стварэнне даступнага асяроддзя для пажылых людзей і захаванне спакойнай старасці. Аб бяспецы расказалі супрацоўнікі Капыльскага РАУС і РАНС, Капыльскага раёна газазабеспячэння і ААТ «ААБ Беларусбанк». Пагаварылі па душах і з псіхолагам райбальніцы. Закрануты многія пытанні, але ў выступленні кожнага прадстаўніка чырвонай ніткай праходзіла пытанне бяспекі. Удзельнікі дыялогавай пляцоўкі яшчэ раз паслухалі аб тым, як не трапіць на вуду ашуканцаў і не стаць лёгкай здабычай. Убачылі, як выглядаюць пасведчанні служб, спецыялісты якіх могуць прыйсці ў дом для праверкі, напрыклад, пячнога і газавага абсталявання. Асобнай тэмай сталі злачынствы, звязаныя з крадзяжом грошай, таму што часцей за ўсё становяцца ахвярамі людзі пенсійнага ўзросту.
Пасля дыялогавай пляцоўкі спецыялісты Капыльскага ТЦСАН арганізавалі для ўдзельнікаў невялікі квэст. І каб яго прайсці, бабулі і дзядулі павінны былі прымяніць веды, атрыманыя падчас дыялогу. Варта адзначыць, што слухачы аказаліся вельмі ўважлівыя і ніхто не трапіўся на хітрыкі імправізаваных ашуканцаў. Увогуле, карысныя навыкі былі замацаваны.
Напэўна, адна з самых прыемных частак падобных мерапрыемстваў - узнагароджанне тых, чыя актыўная жыццёвая пазіцыя не губляецца нават пасля выхаду на пенсію. Заслужаныя падзякі і кветкі з рук Святланы Маліноўскай і старшыні Савета пажылых грамадзян Алы Раеўскай атрымалі Ядвіга Бярозка, Зоя Дэрр, Марыя Дубовік, Ванда Камінская, Антаніна Кац, Георгій Камяк, Людміла Луцкова, Марыя Наркевiч, Марыя Няверка, Галіна Раеўская, Мікалай Рончык, Ганна Рубіс, Ніна Сергіеня, Ганна Хацько, Людміла Чаркасава, Галіна Міцкевіч, Валянціна Маліноўская, Браніслава Бохан, Валянціна Войтава, Марыя Лазоўская.
Аднак на гэтым сюрпрызы не скончыліся. Невялікі канцэрт удзельнікам мерапрыемства падарылі работнікі ТЦСАН Ірына Рай і Уладзіслаў Капыток. Душэўныя песні аб доме, роднай мове і Беларусі закранулі самыя глыбокія струны душы. А пасля канцэртнай праграмы ўдзельнікаў сустрэчы запрасілі на дэгустацыю выпечкі, якую спецыялісты цэнтра прыгатавалі па бабуліных рэцэптах.
Крысціна ЖАГОЛЬ
Крыніца «СП»
