У Капыльскай ЖКГ адбыўся рэспубліканскі прававы прыём грамадзян. Абмеркавалі надзённыя праблемы і пастараліся вырашыць узнікшыя пытанні.
Усе жадаючыя змаглі агучыць свае пытанні і атрымаць кампетэнтныя адказы ад галоўнага прававога інспектара працы Мінскай гарадской арганізацыі Беларускага прафесійнага саюза работнікаў будаўніцтва і прамысловасці будаўнічых матэрыялаў Іны Мачульскай, пракурора Капыльскага раёна Арцёма Ляўшы і старшыні раённага аб'яднання прафсаюзаў Валянціны Козіч (на здымку).
Работнікі жыллёва-камунальнай гаспадаркі пыталіся аб унясенні змяненняў і дапаўненняў у калектыўны дагавор, узнялі пытанні, якія датычацца выплат заработнай платы па працоўнай дамове, здачы ў арэнду памяшкання ў доме, які не мае статусу жылога, нерухомасці і долевай уласнасці. Таксама закранулі работу ў выхадныя дні: напрыклад, якім чынам можна заахвоціць работніка, на якога ў суботу і нядзелю была ўскладзена грамадская нагрузка?
– Падобныя прававыя прыёмы карысныя і праводзяцца сістэматычна па ўзгадненні Федэрацыі прафсаюзаў і з Генпракуратурай Рэспублікі Беларусь. Яны дазваляюць выявіць праблемы, якія ёсць у калектыве асобна ўзятай арганізацыі і, па магчымасці, аператыўна іх вырашыць, - адзначыў Арцём Ляўша.
Крысціна ЖОГАЛЬ
Крыніца «СП»
