5 кастрычніка члены Савета Рэспублікі Нацыянальнага сходу Рэспублікі Беларусь праводзілі адзіны дзень прыёму грамадзян у Мінскай вобласці. Сенатары наведалі ўсе раёны, дзе сустрэліся з жыхарамі, выслухалі просьбы, прапановы і скаргі, каб па магчымасці паспрыяць у іх вырашэнні.
У Капыльскім райвыканкаме была магчымасць задаць пытанні члену Пастаяннай камісіі Савета Рэспублікі па міжнародных справах і нацыянальнай бяспецы Івану Галаватаму. Аднак ёю ніхто не скарыстаўся.
Тым не менш Іван Іванавіч пагутарыў са старшынёй раённага Савета дэпутатаў Ірынай Кісляк, першым намеснікам старшыні райвыканкама - начальнікам упраўлення па сельскай гаспадарцы і харчаванні Віталём Ракевічам, намеснікам старшыні райвыканкама Святланай Лосік і першым сакратаром райкама ГА «БРСМ», членам маладзёжнага парламента Палаты прадстаўнікоў Нацыянальнага сходу Рэспублікі Беларусь Анастасiяй Збіруховіч.
Сенатара цікавіла сацыяльна-эканамічнае развіццё раёна, найбольш часта задаваемыя пытанні насельніцтвам, рэалізацыя маладзёжнай палітыкі ў раёне і інш. Як паведаміла Ірына Кісляк, на Капыльшчыне аднымі з самых хвалюючых з'яўляюцца пытанні жыллёва-камунальнай гаспадаркі, рамонту дарог (асабліва ў сельскай мясцовасці), водазабеспячэння.
- Важна комплексна вывучыць праблему і па магчымасці вырашыць яе. І калі ёсць шанец дапамагчы чалавеку, мы ім скарыстаемся, — падкрэсліў Іван Галаваты. — Без увагі не застаецца ні адна канструктыўная прапанова ці просьба. Мы заўсёды стараемся аказаць садзейнічанне, вырашыць узнікшае пытанне, узаемадзейнічаючы з мясцовай уладай і зацікаўленымі ведамствамі. Людзей трэба не толькі слухаць, але і чуць. Абыякавасці быць не павінна. Трэба тлумачыць людзям іх правы і абавязкі. Закон павінен выконвацца.
Сяргей КОЗЕЛ
Крыніца «СП»