Значная колькасць пажараў адбываецца ў жылым сектары, асабліва пры надыходзе ацяпляльнага сезона. Праца па іх прафілактыцы знаходзіцца на асаблівым кантролі ў ратавальнікаў. Таму работнікі Капыльскага РАНС сумесна з прадстаўнікамі суб'ектаў праверкі праводзяць прафілактычныя рэйды, каб абследаваць домаўладаннi і навучыць грамадзян правілам пажарнай бяспекі ў побыце.
У адзін з дзён першы намеснік начальніка Капыльскага РАНС Вадзім Мардасевіч, намеснік начальніка Дзмітрый Шаўроў і камандзір аддзялення ПАВЧ №1 г. Капыля Аляксандр Рымашэўскі пабывалі ў аграгарадку Пясочнае, дзе праверылі выкананне патрабаванняў пажарнай бяспекі жыхарамі населенага пункта. Перш за ўсё работнікі райаддзела надалі ўвагу стану пячнога ацяплення ў домаўладаннях, наяўнасці пажарных апавяшчальнікаў і электрычнай праводкі на належным узроўні.
Многія з жыхароў не па чутках ведаюць пра сітуацыю ў раёне, а інструкцыі, рэкамендацыі і здарэнні ў асноўным даведваюцца са старонак газеты «Слава працы». І ўсё ж ратавальнікі яшчэ раз нагадалі аб правілах бяспекі ў побыце, паведамляючы аб наступствах іх невыканання. Бо на коне - жыццё і здароўе людзей. На асаблівым кантролі - адзінокія і адзінока пражываючыя пажылыя грамадзяне і інваліды, шматдзетныя сем'і, беспрацоўныя, а таксама асобы, якія злоўжываюць алкаголем.
Як падзяліўся Вадзім Мардасевіч, людзі імкнуцца выконваць патрабаванні пажарных, аднак трапляюцца і тыя, хто з дзіўнай абыякавасцю ставіцца да ўласнага жыцця.
- Многія разумеюць і ствараюць бяспечныя ўмовы перш за ўсё для саміх сябе і навакольных, таму яны сочаць за правіламі карыстання пячнога ацяплення і электрапрыборамі, - адзначыў Вадзім Аляксандравіч. - Але ўсё роўна застаюцца тыя, хто несур'ёзна ставіцца да асабістай бяспекі. Гэта ў асноўным людзі, якія злоўжываюць спіртнымі напоямі. Яны павінны разумець, што часта ад іх учынкаў могуць пацярпець і іх суседзі.
Па словах Вадзіма Мардасевіча, праца назіральных камісій сумесна з іншымі зацікаўленымі службамі працягнецца.
Павел Шэін
Крыніца «СП»
