Надвор'е сягоння зусім раскапрызілася: то лье без прыпынку, то зносіць шквалістым ветрам. Але, нягледзячы на інтрыгі нябеснай канцылярыі, у гаспадарках Капыльшчыны кіпіць праца. Аграрыі выкарыстоўваюць любую магчымасць, каб вывесці тэхніку на палі. Расказваем, што робяць.
Прыбіраюць буракі…
У сельгаспрадпрыемствах Капыльшчыны актыўна ідзе ўборка цукровых буракоў. Усяго ў раёне цукровы караняплод займае плошчу 6875 гектараў. Ужо 2759 га выкапана, гэта 40% ад агульнага аб'ёму. Накапана ў фізічнай вазе 84 302 тоны.
У гэтым годзе пасевы буракоў асабліва пацярпелі ад жнівеньскай засухі, на некаторых палях карняплоды практычна высахлі, не паспеўшы набраць масу. Сярэдняя ўраджайнасць па раёне сёння складае 306 ц/га. Самую высокую паказваюць у ЗАТ «Жыліхава» - 400 ц/га.
…Кукурузу на сілас і зерне
У гаспадарках вядзецца ўборка кукурузы на сілас. Па плане неабходна ўбраць 14163 га, выканана 66% ад агульнай плошчы. Сярэдняя ўраджайнасць па раёне складае 266 ц/га, лепшую атрымалі ў ААТ «Семежава» і ЗАТ «Жыліхава», 357 і 317 ц/га, адпаведна.
Аграрыі ўключаюцца ва ўборку кукурузы на зерне. Пакуль што гэта работа пачата ў ААТ «Піянер-Агра», «Старыца-Агра», КСУП «Дактаровічы» і УП «ПIК-Лясное».
…Бульба
Апрацоўкай другога хлеба беларусаў у нашым раёне займаюцца толькі чатыры гаспадаркі. Гэта ААТ «Старыца-Агра», «Семежава», «Скабін» і КСУП «Дактаровічы». Больш за палову - 56% - ужо прыбралі, са 110 га сабралі 3432 тоны. Сярэдняя ўраджайнасць - 313 ц/га, у мінулым годзе гэты паказчык быў роўны 257 ц/га.
…І салому
Кожную пагодлівую хвіліну аграрыі выкарыстоўваюць і для ўборкі саломы. Гэта пытанне - на парадку дня, бо неабходна вызваляць глебу і рыхтаваць яе пад зімовую сяўбу. Практычна ўсю салому ўжо спрэсавалі, 88% запрасаванай саломы звезена. Засталося вызваліць 4732 гектары.
Гатовяць глебу пад зімовую сяўбу
Адна з першачарговых задач, якія стаяць перад аграрыямі — падрыхтоўка глебы пад зімовую сяўбу. Пад збожжавыя культуры неабходна ўзараць 31100 га. Гэта работа выканана на 62 працэнты. Больш за ўсё гектараў апрацавана ва УП «ПIК-Лясное».
Уносяць мінеральныя ўгнаенні…
Азімы клін угнойваюць фосфарам, ім апрацавана 9920 га. І каліем, які ўнеслі на плошчы 19214 га.
…І арганіку
Пад зімовую сяўбу на палях раёна ўнесена 110 627 тон арганічных угнаенняў, а гэта 47% да задання. Нарыхтавана 400745 тон, што складае 171% да плана. Больш за 344 тыс. тон ужо вывезена на палі.
Сеюць збожжавыя
Пшаніцу, ячмень, трыцікале і жыта. Практычна завершана сяўба азімага ячменю, на 75 працэнтаў засеялі плошчы, адведзеныя пад азімую пшаніцу. У сяўбу гэтых культур уключыліся ўсе сельгаспрадпрыемствы без выключэння.
На фінішную прамую па сяўбе выйшлі ў ЗАТ «Жыліхава», крыху адстаюць і ў ААТ «Семежава». Самымі нізкімі тэмпамі гэта праца вядзецца ў ААТ «Скабін».
Лічбы прыведзены па дадзеных аператыўных зводак упраўлення па сельскай гаспадарцы і харчаванні райвыканкама па стане на 5 кастрычніка 2022 года.
Крыніца «СП»
