Экскурсію па раённым аддзеле ўнутраных спраў для навучэнцаў 10 і 11 класаў правялі намеснік начальніка Капыльскага РАУС Уладзімір Рудакоўскі і старшы інспектар групы кадраў Аксана Гузава. Рабятам паказалі, як функцыянуе сістэма органаў унутраных спраў.
«Сэрца» РАУС - так называюць аператыўна-дзяжурную службу. Яе працу школьнікі змаглі ўбачыць на свае вочы. Супрацоўнікі міліцыі паказалі, як паступаюць і фіксуюцца званкі грамадзян і што можна ўбачыць на камерах назірання, якія ўстаноўлены на гарадскіх вуліцах. Пасля хлопцам паказалі месца, куды дастаўляюць парушальнікаў і грамадзян, якія знаходзяцца ў стане алкагольнага ап'янення.
Спецыяльныя машыны, якія выкарыстоўваюць міліцыянеры на службе, будучыя абітурыенты ўбачылі ва ўнутраным дворыку РАУС. А вось сродкі індывідуальнай абароны — каску і бронекамізэльку — Уладзімір Рудакоўскі прадэманстраваў, надзеўшы іх на аднаго з хлопцаў.
Пасля экскурсійнай праграмы школьнікаў запрасілі ў актавую залу, дзе паказалі фільм пра працу міліцыі, а таксама распавялі, як і куды трэба паступаць, каб пасля працаваць у органах унутраных спраў.
Так, такімі ўстановамі адукацыі з'яўляецца сталічная Акадэмія МУС Рэспублікі Беларусь і Магілёўскі інстытут МУС Рэспублікі Беларусь. Для паступлення патрабуюцца сертыфікаты цэнтралізаванага тэсціравання па адной з выбраных дзяржаўных моў, замежнай мове і грамадазнаўству. Тыя абітурыенты, якія выкажуць жаданне стаць студэнтамі Акадэміі МУС Беларусі, павінны падаць заяву або рапарт да 15 красавіка 2023 года.
– Дні адчыненых дзвярэй мы праводзім для таго, каб хлопцы пазнаёміліся з працай праваахоўнікаў, убачылі ўсе на свае вочы і паступалі ў нашы профільныя ўстановы адукацыі. Будзем рады, калі нехта звяжа сваё жыццё са службай у міліцыі, – адзначыў Уладзімір Рудакоўскі.
Крысціна ЖАГОЛЬ
Крыніца «СП»
