Як вядома, Прэзідэнт Беларусі Аляксандр Лукашэнка распарадзіўся з 6 кастрычніка ўвесці забарону на павышэнне цэн у краіне. Аб гэтым ён заявіў па выніках нарады з эканамічным блокам на тэму інфляцыі.
Старшыня раённага аб'яднання прафсаюзаў Валянціна Козіч і старшыня райкама прафсаюза работнікаў адукацыі і навукі Марына Крэпская правялі маніторынг цэн у адной з крам буйной гандлёвай сеткі «Еўраопт». Праверылі цэннікі на сацыяльна значныя тавары: малочную і мясную прадукцыю, хлебабулачныя вырабы, крупы, а таксама на агародніну і садавіну. Яны запатрабаваны кожнай сям'ёй і жыццёва неабходныя.
■ Марына Крэпская і Валянціна Козіч маніторыць цэны ў краме «Еўраопт»
- Кошт прадуктаў з 6 кастрычніка не змяніўся, - пракаментавала сітуацыю Валянціна Козіч. - І калі раней сапраўды назіралася тэндэнцыя да павышэння, то сёння цэннікі застаюцца на тым жа ўзроўні, што і тыдзень таму. Падобныя маніторынгі будуць працягвацца. Прычым не толькі ў буйных гарадскіх гандлёвых сетках, але і ў магазінах аграгарадкоў і вёсак, у тым ліку і ў аўтакрамах.
Варта адзначыць, што праверкі накіраваны на тое, каб не дапусціць фактаў павышэння цэн на любыя тавары. Пасля нарады ў Кіраўніка дзяржавы прадстаўнікі Камітэта дзяржкантролю, прафсаюзаў, МАРГ выйшлі ў гандлёвыя сеткі з маштабнымі маніторынгамі. Аналізуюць цэны ў сеткавых супермаркетах і ў крамах крокавай даступнасці. Маніторынгі праходзяць ва ўсіх рэгіёнах краіны.
Крысціна ЖАГОЛЬ
Крыніца «СП»