Пакуль яшчэ захоўваецца цалкам для восеньскай пары спрыяльнае надвор'е, хоць туманы, а месцамі і дажджы для аўтаўладальнікаў ствараюць пэўны дыскамфорт на дарозе, паведамляе старшы інспектар аддзялення ДАІ Капыльскага РАУС Сяргей Барадзін. Зусім хутка прагназуюцца замаразкі і мінусавая тэмпература. І тым самым кожнаму кіроўцу неабходна ўлічваць, што ў выніку перападу тэмпературы паветра з плюсу на мінус ці наадварот — на праезнай частцы ўтворыцца галалёдзіца.
— Пры пагаршэнні пагодных умоў мы настойліва рэкамендуем вадзіцелям быць вельмі ўважлівымі пры кіраванні транспартнымі сродкамі, па магчымасці пазбягаць перастраенняў і такога небяспечнага манеўру, як абгон. - распавёў інспектар. - Тармазіць загадзя і плаўна — любы рэзкi рух руля імгненна разварочвае машыну папярок дарогі. І, вядома, правільны выбар бяспечнай хуткасці руху з улікам пагодных і дарожных умоў.
Таксама Сяргей Барадзін рэкамендуе не чакаць 1 снежня, а загадзя на аўтамабілі змяніць летнюю гуму на зімовую:
- Як вядома, пры зніжэнні тэмпературы паветра стандартная летняя гума схільная зацвярдзенню, якое прыкметна памяншае каэфіцыент счаплення з дарогай і пагражае тым, што транспартны сродак можа лёгка «занесці».
Будзьце ўважлівыя на дарозе! Беражыце сябе і сваіх пасажыраў!
Павел Шэін
Крыніца «СП»