Адбылася чарговая сесія раённага Савета дэпутатаў. Асноўным пытаннем стаў аналіз работы і меры па папярэджанні пажараў і гібелі людзей ад іх. Удзел у пасяджэнні прыняў і старшыня райвыканкама Сяргей Пілішчык.
Як адзначыў у дакладзе начальнік Капыльскага раённага аддзела па надзвычайных сітуацыях Віталь Буняк, колькасць надзвычайных сітуацый у Капыльскім раёне за 10 месяцаў 2022 года ў параўнанні з аналагічным перыядам 2021 года зменшылася на 8 працэнтаў.
– Асноўнымі прычынамі ўзнікнення пажараў у 2022 годзе з'явіліся: неасцярожнае абыходжанне з агнём, парушэнне правілаў уладкавання і эксплуатацыі печаў, цеплагенерыруючых агрэгатаў і прылад, парушэнне правілаў уладкавання і эксплуатацыі электрасетак і электраабсталявання. Найбольшая колькасць пажараў і гібелі людзей ад іх адбываецца ў жылым сектары, - адзначыў Віталь Буняк.
Асаблівая ўвага надаецца жылому сектару, у прыватнасці, адзінокім і адзінока пражываючым пенсіянерам. Ратавальнікі заўсёды ўважліва аглядаюць домаўладанні пажылых людзей на пажарную бяспеку, прапануюць сваю дапамогу, калі яна неабходна.
Таксама Віталь Міхайлавіч падкрэсліў, што ў мэтах папярэджання пажараў і гібелі людзей ад іх асноўныя намаганні неабходна засяродзіць на правядзенні інфармацыйна-тлумачальнай і пажарна-прафілактычнай работы ў жыллёвым фондзе.
– У напрамку прафілактыкі яе суб'екты робяць шмат, аднак пазбегнуць пажараў зусім, не атрымліваецца. Для гэтага трэба быць больш пільнымі да катэгорыі грамадзян, якія злоўжываюць спіртнымі напоямі, - адзначыла старшыня і райсавета дэпутатаў Ірына Кісляк. - Прапаную дэпутацкаму корпусу і ўсім іншым зацікаўленым структурам не заставацца ў баку ад тэмы пажарнай бяспекі. Не лішнім будзе назіральным камісіям часцей наведваць сем'і, правяраць спраўнасць АПА, пячнога ацяплення і праводзіць прафілактычную работу. Бо нам наведаць сям'ю не складана, а цана за памылку можа каштаваць чалавечага жыцця.
Як паведаміла спецыяліст сектара прапаганды і ўзаемадзеяння з грамадскасцю Капыльскага РАНС Марыя Дзічкоўская, з праведзеных штогадовых аналізаў існуючай сітуацыі вынікае, што, як правіла, пажары адбываюцца там, дзе адсутнічае належная сістэмная і якасная прафілактычная работа ўсіх зацікаўленых суб'ектаў прафілактыкі, якія, у сваю чаргу, павінны быць аб'яднаны ў адну сілу ў выглядзе назіральных камісій.
Сяргей КОЗЕЛ
Крыніца «СП»
