Грып, ВРВІ і каранавірусная інфекцыя нікуды не зніклі. У апошні час пра Ковід-19 не так часта кажуць, але ўсё ж выпадкі захворвання фіксуюцца.
Як паведамляе загадчыца паліклінікі Капыльскай ЦРБ Ларыса Пацейковіч, у раёне вакцынацыя ад грыпу і Ковід-19 праходзіць і дагэтуль.
– Насельніцтва Капыльшчыны ведае, што ў паліклініцы цэнтральнай раённай бальніцы, альбо ў раённых установах аховы здароўя можна зрабіць прышчэпку ад сезонных захворванняў – Ковід-19 і грыпу. Па апошніх дадзеных ад грыпу прышчапілася 33% насельніцтва, а бустэрнай вакцынай ад каранавіруснай інфекцыі - каля 40%. Варта адзначыць, што ў нашай установе аховы здароўя з'явілася навінка - кубінская бустэрная вакцына «Soberana Plus». Акрамя яе таксама ёсць кітайская «Vero Cell» і расійская «ГамКовидВак».
Многія жыхары раёна не па чутках ведаюць, што асноўныя сродкі індывідуальнай абароны ніхто не адмяняў, асабліва ў восеньскі перыяд. Медыцынскія маскі ў большай ступені неабходны хворым людзям. Абавязкова рэгулярная гігіена рук і апрацоўванне іх антысептычным сродкам. У месцах вялікай колькасці людзей заўсёды трэба знаходзіцца на адлегласці як мінімум аднаго метра ад людзей, якія чхаюць і кашляюць. І, вядома ж, не займацца самалячэннем. У выпадку павышэння тэмпературы цела, з'яўлення кашлю і цяжкасці дыхання неадкладна звяртацца па медыцынскую дапамогу.
Наталля ДАВЫДЗЕНКА
Крыніца «СП»