У мінулыя выхадныя ў Капылі ўшаноўвалі працаўнікоў сельскай гаспадаркі і перапрацоўчай прамысловасці раёна.
На гарадской плошчы раскінулася выстава сельскагаспадарчай тэхнікі «Аграсалон», дзе былі прадстаўлены лепшыя ўзоры сучасных трактароў, збожжаўборачных і буракаўборачных камбайнаў, пагрузчыкаў, апырсквальнікаў і шмат чаго іншага: таго, на чым сёння аграрыі прыбіраюць хлеб і апрацоўваюць зямлю.
На інтэрактыўных выставах і фотазонах «Родныя Матывы» можна было зрабіць памятныя фатаграфіі, а мяккі сняжок, які падаў на зямлю вялікімі шматкамі, надаваў асаблівую прыгажосць. Усе імправізаваныя падворкі створаны рукамі работнікаў сельгаспрадпрыемстваў: тут і гарбузы, і саленні-варэннi, роставыя кветкі, фігуры казачных персанажаў, малыя архітэктурныя формы і многае іншае.
У фае Капыльскага РЦК госці свята змаглі прадэгуставаць прадукцыю перапрацоўчай прамысловасці - Капыльскага кааппрама і Капыльскага філіяла ААТ «Слуцкі сыраробны камбінат». Некалькі відаў каўбасных вырабаў, сыры, ёгурты, глазураваныя сыркі, масла — прысутныя ацанілі смакавыя якасці прапанаваных прадуктаў.
Тут жа была прадстаўлена выстава фотаработ карэспандэнтаў рэдакцыі газеты «Слава працы». Гэта кадры з паўсядзённага жыцця працаўнікоў вёскі, імгненні, з якіх складваецца напружаны працоўны дзень. А супрацоўнікі рэдакцыі ўручалі гасцям святочны спецвыпуск.
■ Супрацоўнікі рэдакцыі Вольга Лосева і Вікторыя Кажура раздаюць гасцям святочны нумар «СП»
Асаблівай увагі заслугоўвалі караваі, іх пастараліся ўпрыгожыць як мага ярчэй. А кошыкі «Дары зямлі Капыльскай» у гаспадарках афармлялі з асаблівай цеплынёй, таму што менавіта іх уручылі залатому фонду любога сельгаспрадпрыемства — ветэранам працы. Падчас урачыстай часткі святочнага дня адбылося ўшанаванне лепшых з лепшых.
■ Сяргей Пілішчык (у цэнтры) і лепшыя аграрыі Капыльшчыны
- Сёлета складаныя ўмовы надвор'я і іншыя цяжкасці сталі для нас праверкай на трываласць. І я з гонарам заўважу, што аграрыі Капыльшчыны прайшлі іх годна, у чарговы раз даказалі, што сельская гаспадарка — доля стойкіх і моцных людзей, здольных самааддана працаваць і дасягаць вынікаў у любых сітуацыях, — адзначыў у сваім віншаванні старшыня Капыльскага райвыканкама Сяргей Пілішчык.
■ Узнагароду аператару машыннага даення з ААТ «Піянер-Агра» Алы Лахай уручае старшыня Капыльскага раённага Савета дэпутатаў Ірына Кісляк
Сяргей Міхайлавіч падзякаваў лепшым працаўнікам капыльскай зямлі і адкрыў цырымонію ўзнагароджання. Кіраўнік раёна ўручыў нагрудны знак адзнакі «За заслугі ў сельскай гаспадарцы» дырэктару Капыльскага філіяла РУСП «Мінскае племпрадпрыемства» Валянціне Александровіч, Ганаровую грамату Міністэрства сельскай гаспадаркі і харчавання механізатару філіяла «Вялікая Раёўка» Мікалаю Лук'янчыку, падзяку міністра сельскай гаспадаркі і харчавання галоўнаму бухгалтару ААТ «Піянер-Агра» Ірыне Апанасевіч, Ганаровую грамату Мінскага аблвыканкама начальніку таварнай фермы «Навасёлкі» ААТ «Капыльскае» Наталлі Лобан, падзяку старшыні Мінскага аблвыканкама начальніку МТК «Лотвіны» УП «ПIК-Лясное» Алене Кунцэвіч. Ганаровай граматы Капыльскага райвыканкама ўдастоены чатыры дзясяткі чалавек.
Заслужаныя ўзнагароды ў Капыльскім райвыканкаме аграрыям уручыў таксама і намеснік старшыні - начальнік упраўлення па сельскай гаспадарцы і харчаванні Віталь Ракевіч.
■ Віталь Ракевіч уручае ўзнагароду Аляксандру Жгуну, кіроўцу з ААТ «Старыца-Агра»
— Хачу падзякаваць усім работнікам сельскагаспадарчай і перапрацоўчай галін за нялёгкую, але такую неабходную ўсім нам працу, за разуменне аб'ектыўных цяжкасцей у аграрнай вытворчасці і ўменне пераадольваць іх насуперак любым стыхіям, за вялікую сялянскую мудрасць, — звярнуўся да прысутных Віталь Аляксандравіч.
Віншаванні аграрыі Капыльшчыны прымалі і ад гасцей свята — генеральнага дырэктара ААТ «Слуцкі мясакамбінат» Сяргея Пазняка і начальніка службы па сельскай гаспадарцы ААТ «Слуцкі цукрарафінадны камбінат» Уладзіміра Крывіцкага.
Нотку весялосці ў шэраг узнагароджанняў уносілі лепшыя калектывы Капыльшчыны, а яркім заключным акордам урачыстасці стала выступленне беларускага віртуоза-балалаечніка Аляксандра Варанішча.
■ На сцэне — Аляксандр Варанішча
Асобна хочацца расказаць пра Фаіну Тараповіч, на грудзях якой красаваліся ўзнагароды за працоўныя заслугі: медаль «Ветэран працы», знакі «Ударнік XI пяцігодкі», «Пераможца спаборніцтва 1974 года» і «Пераможца спаборніцтва 1978 года».
Фаіна Данілаўна многія гады працавала ў саўгасе «Цімкавічы» (цяпер ААТ «Капыльскае»). Далікатнай жанчыне ўсе працы былі па плячы - жывёлагадоўля, паляводства і многія іншыя напрамкі. Часцей за ўсё жанчына была на перадавых пазіцыях. У Фаіны Тараповіч нямала грамат і падзяк, была занесена на раённую Дошку гонару.
Крысціна ЖАГОЛЬ
Крыніца «СП»
