У рэдакцыю газеты звярнулася жыхарка райцэнтра. Яе цікавіў новы радок, які з'явіўся ў паведамленні за аплату жыллёва-камунальных паслуг.
Што гэта за паслуга, хто яе будзе аказваць і колькі мы будзем плаціць - тлумачыць начальнік разліковага цэнтра Капыльскай ЖКГ Святлана РУСАКОВІЧ:
— Рашэннем райвыканкама № 1828 ад 4 кастрычніка 2022 года Капыльская ЖКГ прызначана ўпаўнаважанай асобай па кіраванні агульнай маёмасцю сумеснага домаўладання. У сувязі з гэтым за кастрычнік 2022 года грамадзяне, якія пражываюць у шматкватэрных жылых дамах, у паведамленнях за аплату ЖКП убачылі новы радок «Плата за паслугу па кіраванні агульнай маёмасцю сумеснага домаўладання». У ёй зазначаецца, што плацеж за гэту паслугу штомесяц уносіцца плацельшчыкамі, якія з'яўляюцца ўдзельнікамі сумеснага домаўладання. А вылічацца яна будзе суразмерна агульнай плошчы прыналежнага ўласніку жылля і нежылых памяшканняў у доме, а таксама наймальнікам і арандатарам жылых памяшканняў.
Варта адзначыць, што паслуга далёка не новая. Да 1 чэрвеня 2021 года тарыф сэрвісу па кіраванні агульнай маёмасцю быў уключаны ў тарыфы некалькіх ЖКП: тэхнічнае абслугоўванне дома, вываз ЦКА і санітарнае ўтрыманне дапаможных памяшканняў. Пасля выдзялення гэтай паслугі ў асобны сабекошт вышэйпералічаных паслуг з 1 чэрвеня 2021 года аплата стала меншай. Напрыклад, тарыф за тэхнічнае абслугоўванне дома з 1 чэрвеня 2021 года зніжаны з 0,1322 да 0,1238 руб. за 1 м². За санітарнае ўтрыманне дапаможных памяшканняў з 0,74 руб. да 0,71 руб. на аднаго пражываючага, абыходжанне з ЦКА з 9,2583 руб. да 8,9418 руб. за 1 м³. Ну, а тарыф за паслугу па кіраванні агульнай маёмасцю сумеснага домаўладання складае 0,0177 руб. за 1 м².
Многія пытаюцца, а ці будзе прадастаўляцца паслуга, калі не заключаць дамову? У дадзеным выпадку адзначу, што ў Жыллёвым кодэксе прапісана, што ўпаўнаважаная асоба абавязана прапанаваць спажыўцу заключыць дамову на кіраванне агульнай маёмасцю. У нашым выпадку будзе дзейнічаць дамова з наборам неабходных умоў, заключаецца з усімі атрымоўваючымі паслугу па кіраванні агульнай маёмасцю. Але пры гэтым трэба ведаць, што адсутнасць дагавора са спажыўцом або адмова заключыць такую дамову не вызваляюць ад платы за паслугу па кіраванні. Тут працуе той жа прынцып, як і ў выпадку з прадастаўленнем асноўных ЖКП. Адмовіцца ад гэтай паслугі нельга.
Наталля ДАВЫДЗЕНКА
Крыніца «СП»