Рэспубліканская прафілактычная акцыя «Змяні шыны ў сваёй машыны!» пройдзе ў Капыльскім раёне з 25 лістапада па 5 снежня. 25 лістапада пройдзе Адзіны дзень бяспекі дарожнага руху.
Як распавёў старшы інспектар ДПС аддзялення ДАІ Капыльскага РАУС Сяргей Барадзін, эксплуатацыя аўтамабіля зімой нашмат складаней, чым у іншыя перыяды года і патрабуе ад уладальніка абавязковай падрыхтоўкі. Паводле яго слоў, у зімовы час аўтамабіль працуе ў складаных, а часам нават у экстрэмальных умовах. У сувязі з гэтым вартавыя дарог нагадваюць аб тым, што пры ўдзеле ў дарожным руху з 1 снежня па 1 сакавіка аўтамабілі з тэхнічна дапушчальнай агульнай масай да 3,5 тоны ўключна, легкавыя і грузапасажырскія аўтамабілі з тэхнічна дапушчальнай агульнай масай звыш 3,5 тоны, а таксама аўтобусы з тэхнічна дапушчальнай агульнай масай да 5 тон павінны быць абсталяваны зімовымі шынамі.
— Зімовыя шыны ўстанаўліваюцца на ўсіх колах транспартнага сродку і павінны адпавядаць патрабаванням часткі другой пункта 25 дадатку 4 ПДР, дзе сказана, што зімовыя шыны механічных транспартных сродкаў, прызначаныя для эксплуатацыі на абледзянелым або заснежаным дарожным пакрыцці, — паведаміў Сяргей Барадзін. — Маркіраваныя знакам у выглядзе горнай вяршыні з трыма пікамі і са сняжынкай усярэдзіне яе альбо знакамі «М+S», «M&S», «M.S», «M S» або «All seasons», падчас эксплуатацыі на паказаным пакрыцці маюць рэшткавую вышыню малюнка пратэктара не менш за 4 мм.
Для прычэпаў устанаўліваюцца нормы рэшткавай вышыні малюнка пратэктара шын, аналагічныя нормам для шын механічных транспартных сродкаў, у счэпцы з якімі яны ўдзельнічаюць у дарожным руху.
Зімовыя шыны дапамагаюць скараціць тармазны шлях і значна паляпшаюць кіраванне аўтамабілем ва ўмовах галалёду. Пры нізкіх тэмпературах летняя гума цвярдзее і перастае выконваць свае функцыі па забеспячэнні добрага счаплення з дарожным пакрыццём, выкарыстанне такіх шын становіцца небяспечным.
У выпадку, калі на транспартным сродку ўстаноўлены летнія або зімовыя шыны, але рэшткавая вышыня малюнка пратэктара складае менш за 4 мм, адказнасць надыходзіць па частцы 2 артыкула 18.11 КоАП Рэспублікі Беларусь (кіраванне транспартным сродкам, які мае няспраўнасці) – цягне папярэджанне або накладанне штрафу у памеры да 1 базавай велічыні. Тое ж дзеянне, учыненае паўторна на працягу аднаго года, будзе кваліфікавацца па частцы 8 артыкула 18.11 КоАП Рэспублікі Беларусь і прывядзе да накладання штрафу ў памеры ад 2 да 5 базавых велічынь.
Павел Шэін
Крыніца «СП»