Капыльскі РАНС паведамляе, што 10 і 11 снежня ў раёне пройдзе маштабная пажарна-прафілактычная акцыя па папярэджанні пажараў і гібелі людзей ад іх.
У склад удзельнікаў акцыі ўвойдуць назіральныя камісіі, курсанты і выкладчыкі ўніверсітэта грамадзянскай абароны МНС Беларусі, прадстаўнікі Мінскага абласнога ўпраўлення МНС, асабісты склад Капыльскага раённага аддзела па надзвычайных сітуацыях. Рэйдавыя групы накіруюцца ў Блеўчыцкі і Семежаўскі сельскія саветы.
У ходзе прафілактычных мерапрыемстваў спецыялісты абследуюць на прадмет бяспекі домаўладання, нагадаюць жыхарам алгарытм дзеянняў у выпадку НС, раскажуць пра важнасць устаноўкі ў жылых пакоях аўтаномнага пажарнага апавяшчальніка, уручаць наглядную выяўленчую прадукцыю супрацьпажарнай тэматыкі. Асаблівы акцэнт - на адрасы, дзе пражываюць адзінокія і адзінока пражываючыя пажылыя грамадзяне, інваліды, шматдзетныя сем'і і асобы, якія злоўжываюць алкаголем. У цэнтры ўвагі таксама непрацуючыя грамадзяне працаздольнага ўзросту.
Ратавальнікі заклікаюць: прывядзіце свае дамы ў пажарабяспечны стан і дапамажыце гэта зрабіць сваім састарэлым сваякам. Для гэтага адрамантуйце печы, замяніце старую электраправодку, не эксплуатуйце няспраўныя бытавыя прыборы, будзьце асаблiва асцярожныя пры курэнні.
Наталля Давыдзенка
Крыніца «СП»