На цэнтральнай плошчы горада ля галоўнай ёлкі сабраліся дарослыя і дзеці, каб на Капыльшчыне даць старт дабрачыннай акцыі «Нашы дзеці».
Надвор'е спрыяльнае, трохі парашыць сняжок, ствараючы вясёлы настрой і прадчуванне чараўніцтва. Да натоўпу святочна настроеных дзяцей набліжаюцца Дзед Мароз і Снягурка. Многія хлопцы захоплена крычалі і рады былі ўбачыць казачных герояў.
Марозка з унучачкай пажадалі ўсім дзецям здароўя, станоўчых адзнак і выканання запаветных жаданняў. Затым запрасілі ўсіх вадзіць карагоды вакол галоўнай прыгажуні.
У гэтыя святочныя дні для ўсіх дзяцей будуць арганізаваны незабыўныя мерапрыемствы: навагоднія прадстаўленні, сустрэчы з казачнымі героямі, канцэрты, конкурсы і многае іншае. Не застануцца без увагі дзеці-інваліды і дзеці, якія апынуліся ў цяжкіх жыццёвых сітуацыях. Сацыяльна-педагагічны цэнтр, прыёмныя сем'і наведаюць госці з падарункамі і падораць дзецям вясёлы настрой.
Наталля Давыдзенка
Крыніца «СП»
