На прыём да старшыні райвыканкама Сяргея Пілішчыка ў асноўным прыходзяць грамадзяне, якія самастойна не могуць вырашыць свае пытанні.
Дапамагчы справіцца з праблемамі імкнуцца ў райвыканкаме. Аднак не заўсёды можна адразу дасягнуць жаданага - часам узнікаюць нюансы, якія не бачны з першага погляду.
Як заўсёды, не абышлося без пытанняў, звязаных з жыллёва-камунальнай гаспадаркай. Жыхарка дома 1Б па вуліцы Цімкавіцкай у Капылі скардзілася на гул, які выдае цыркуляцыйная помпа, размешчаны ў склепе пад яе кватэрай. Жанчына неаднаразова звярталася ў ЖКГ, але пытанне станоўча пакуль не вырашылася. Было прынята рашэнне правесці дадатковае абследаванне, па выніках якога і стане ясна, магчыма і ці патрэбна замена абсталявання. Заяўніца будзе запрошана на чарговы прыём грамадзян праз два тыдні, дзе ёй будзе дадзены канчатковы адказ.
Пытанні працаўладкавання таксама часта гучаць на прыёмах грамадзян. У гэты раз звярнулася жанчына, якая ў дадзены момант працуе, але ў сувязі з пагаршэннем стану здароўя хацела б звольніцца. Спецыфіка яе месца працы не дазваляе на працягу навучальнага года вызваліць ад займаемай пасады, так як няпроста знайсці замену. Як паабяцаў кіраўнік раёна, пытанне будзе дэталёва вывучана і заяўніца атрымае пісьмовы адказ.
Сяргей КОЗЕЛ
Крыніца «СП»
