Маладзёжны перасоўны шматпрофільны цэнтр усё больш і больш набірае папулярнасць у жыхароў малых населеных пунктаў Капыльшчыны. Зусім нядаўна адмыслоўцаў розных сфер дзейнасці сустракалі ў вёсцы Вялікая Раёўка.
У адміністрацыйным будынку дырэктар філіяла ААТ «Крыніца» «Вялікая Раёўка» Іван Дамашэвіч і старшыня Цімкавіцкага сельвыканкама Алена Вострыкава сустракалі гасцей. Утульныя і цёплыя кабінеты, салодкі чай і цукеркі. У цэлым, камфортны прыём быў забяспечаны.
Іван Віктаравіч адзначыў, што форма работы шматпрофільнага цэнтра цікавая і цяпер вельмі актуальная для людзей, якія жывуць у сельскай мясцовасці. За тыдзень да прыбыцця спецыялістаў былі размешчаны аб'явы на гандлёвым аб'екце «Родны кут», фельчарска-акушэрскім пункце, бібліятэцы-клубе і ў сетцы інтэрнэт у групе філіяла.
Для аказання мясцовым жыхарам кансультатыўнай дапамогі прыбылі спецыялісты ў складзе загадчыка сектара рознічнага і карпаратыўнага бізнесу ААТ «ААБ Беларусбанк» ЦБУ № 609 Святланы Пабока, начальніка аддзела пенсійнага забеспячэння, прызначэння і выплаты пенсій і дапамог упраўлення па працы, занятасці і сацыяльнай абароне райвыканкама Святланы Бахты, начальніка аддзела ЗАГС райвыканкама Вікторыі Траяновіч, кансультанта натарыяльнай канторы Аксаны Каляды, спецыяліста аддзялення сацыяльнай адаптацыі і рэабілі Капыльскага ТЦСАН Надзеі Рыбак, фельчара Вялікараёўскага ФАПа Святланы Пашчэні.
Усім цікава было паслухаць Святлану Пабоку, якая расказала пра тое, як не паддацца на правакацыю ашуканцаў і засцерагчы сябе і свае грошы. Святлана Уладзіміраўна прыводзіла цікавыя прыклады з жыцця кліентаў банка. Некаторыя прысутныя дзяліліся сваімі гісторыямі.
Як паказвае практыка, прыезд цырульніка Капыльскага РКБА заўсёды выклікае вялізны ажыятаж. Не паспела Наталля Татур пераступіць парог, як яе чакаў першы наведвальнік.
- Я ўпершыню стала ўдзельнікам падобнага мерапрыемства, - кажа Наталля Станіславаўна. - Гэта ніяк не перашкаджае рабіць сваю працу, а наадварот, уносіць свайго роду навіну. Змена абстаноўкі нікому не перашкодзіць, тым больш гэта сфера паслуг вельмі запатрабавана заўсёды і ўсюды.
Акрамя гэтага, у рамках акцыі «Цуды на Каляды» член маладзёжнага парламента Дар'я Сячко наведала шматдзетную сям'ю Кацярыны і Віктара Буданавых, якія выхоўваюць чацвярых дзяцей. Малады актывіст павіншавала бацькоў і дзяцей з надыходзячымі Калядамі і Новым годам і падарыла падарункі.
Усе, каму ў гэты дзень неабходна была кансультацыя, ёй скарысталіся. А цудоўным завяршэннем працы стаў канцэрт мастацкай самадзейнасці, падрыхтаваны работнікамі РЦК.
Наталля ДАВЫДЗЕНКА
Крыніца «СП»
