Штогод тонкі лёд становіцца прычынай гібелі не толькі рыбакоў, якія неабачліва рызыкнулі выйсці парыбачыць, але і дзяцей, якія гуляюць паблізу змёрзлых вадаёмаў без нагляду бацькоў.
Як засцерагчы сябе і пазбегнуць няшчаснага выпадку на тонкім лёдзе, расказаў начальнік Нясвіжскай міжраённай інспекцыі аховы жывёльнага і расліннага свету Дзмітрый РЫЛАЧ:
Каб пазбегнуць няшчаснага выпадку, неабходна выконваць правілы паводзін на лёдзе. Нельга выходзіць на неакрэплы лёд. Больш-менш бяспечным лічыцца лёд таўшчынёй 7-10 сантыметраў. Яго можна вызначыць па колеры - ён зялёны або блакітна-зялёны. Брудны і бура-шэры лёд, як правіла, нетрывалы. Правяраць трываласць лёду ўдарамі ног небяспечна. Для гэтага неабходна выкарыстоўваць кол ці пешню. Калі пасля першага ўдару лёд прабіваецца і на ім з'яўляецца вада, варта неадкладна спыніцца і рухацца зваротна па сваіх слядах, пры гэтым першыя крокі трэба рабіць, не адрываючы падэшвы ад лёду. Не рэкамендуецца выходзіць на лёд у завею і цёмны час сутак. Забараняецца скакаць і бегаць па змёрзлай ледзяной роўнядзі, збірацца вялікімі групамі. Пры руху групамі неабходна рухацца на адлегласці 5-6 метраў адзiн ад аднаго. Варта адмовіцца ад выкарыстання змёрзлых рэк і азёр, каб скараціць шлях.
Любіцелям зімовай рыбалкі рэкамендуецца мець пры сабе выратавальную камізэльку і ліну (вяроўку) даўжынёй 15-20 метраў з пятлёй на адным канцы і грузам вагой 400-500 г на іншым. Апроч усяго гэтага бацькам не варта забываць праводзіць з дзецьмі тлумачальныя гутаркі аб небяспецы знаходжання на змёрзлых вадаёмах. Бо няўстойлівы лёд можа прывесці да трагедыі.
Падрыхтавала Наталля ДАВЫДЗЕНКА
Крыніца «СП»
