Капыльскі дзяржаўны каледж неаднаразова выходзіў пераможцам у розных конкурсах. Так, у чарговы раз установа прафесійнай адукацыі заняла 3 месца ў абласным аглядзе-конкурсе ў намінацыі «Лепшае афармленне музейнага кутка/стэнда, прысвечанага памяці ахвяр генацыду беларускага народа ў гады Вялікай Айчыннай вайны і пасляваенны перыяд».
Намеснік дырэктара па выхаваўчай рабоце Наталля Кудзелка адзначыла, што пры стварэнні кутка была праведзена маштабная пошукава-даследчая работа сумесна з пракуратурай Капыльскага раёна, раённым краязнаўчым музеем, аддзелам ідэалагічнай работы, культуры і па справах моладзі Капыльскага райвыканкама.
Экспазіцыя была створана бібліятэкарам Ірынай Пяткевіч і выкладчыкам гісторыі Аленай Радкевіч. Яна змяшчала архіўныя матэрыялы, дакументальную і мастацкую літаратуру па абазначанай тэме, карту спаленых вёсак на тэрыторыі Рэспублікі Беларусь у гады Вялікай Айчыннай вайны, музейныя экспанаты, атрыманыя ў ходзе пошукавай дзейнасці педагогаў і навучэнцаў каледжа, а таксама матэрыялы даследчых работ.
- У Капыльскім дзяржаўным каледжы экспазіцыю ўжо наведалі 540 навучэнцаў, 129 работнікаў, з іх 69 педагогаў, 162 навучэнцы ўстаноў агульнай сярэдняй адукацыі Капыльскага раёна, - працягвае Наталля Уладзіміраўна. - Адзначу, што летам 2022 года куток, прысвечаны памяці ахвяр генацыду беларускага народа ў гады Вялікай Айчыннай вайны і пасляваенны перыяд, быў размешчаны ў бібліятэцы каледжа, дзе праводзіліся тэматычныя мерапрыемствы: куратарскія гадзіны, урокі мужнасці, дні памяці і іншыя. Выстава аказалася настолькі запатрабаванай у педагогаў і навучэнцаў каледжа, што адміністрацыяй было прынята рашэнне стварыць экспазіцыйную галерэю, прысвечаную гэтай жа тэматыцы.
Дарэчы, у трох намінацыях агляду-конкурсу прынялі ўдзел прадстаўнікі ўсіх раёнаў Мінскай вобласці, дзе было прадстаўлена 76 работ. З іх 58 работ устаноў агульнай сярэдняй адукацыі, 18 - устаноў прафесійнай адукацыі.
Наталля ДАВЫДЗЕНКА
Крыніца «СП»
