Урач акушэр-гінеколаг жаночай паліклінікі Капыльскай ЦРБ Аксана Бурачэўская вядзе прыём ужо трэцяга пакалення цяжарных жанчын. І не дзіўна, бо працоўны стаж працы кваліфікаванага спецыяліста 28 гадоў. Яна ведае ўсіх сваіх пацыентаў і да кожнага ставіцца з павагай і належнай увагай.
Аксана Бурачэўская ўпэўнена, што ў зладжанай і карпатлівай працы ўсяго калектыву гінекалагічнага аддзялення заўсёды прысутнічае ўзаемападтрымка, сяброўства і давер, бо на коне стаяць жыцці людзей: мамы і яе дзіцяці.
- Я люблю і цаню сваю працу, сваіх калег, - акцэнтуе Аксана Аляксандраўна. - За доўгія гады працы ганаруся, што прыношу карысць людзям, бо для мяне гэта важна. А шчырая падзяка пацыентаў - самая дарагая ўзнагарода.
На працягу шматгадовай і добрасумленнай працы ў сістэме аховы здароўя Аксана Бурачэўская зарэкамендавала сябе са станоўчага боку як вопытны і патрабавальны ўрач. Яна ўмела арганізоўвае сваю працу, і строга выконвае працоўную дысцыпліну. Заўсёды ўважліва і абачліва ставіцца да падначаленых, аказваючы ім дапамогу і падтрымку. Каштоўны вопыт урача акушэра-гінеколага дазваляе аператыўна выконваць пастаўленыя задачы, чым яна бязмерна ганарыцца. Аксана Аляксандраўна з радасцю гатова падзяліцца ведамі з маладымі спецыялістамі, якія будуць развіваць і ўдасканальваць свае веды ў галіне аховы здароўя.
Крыніца «СП»