А вы каштавалі вараныя каўбасы ад Капыльскага кааппрама? Мы пакаштавалі і з упэўненасцю можам сказаць: «Смачна!»
Зусім нядаўна, у канцы снежня мінулага года, прадпрыемства закупіла вакуумны кутэр для вытворчасці гэтай прадукцыі, якая за невялікі прамежак часу ўжо спадабалася многім пакупнікам.
Ні для каго не сакрэт, што працаўнікі Капыльскага кааппрама працуюць па прынцыпе «Выбірай роднае, купляй сваё - тое, што зроблена з любоўю». Увесь калектыў на чале з дырэктарам прадпрыемства Тамарай Абрамовіч прыкладае максімум намаганняў для таго, каб асартымент прадукцыі заўсёды карыстаўся попытам не толькі за межамі краіны, вобласці, рэгіёна, але перш за ўсё ў саміх капылян.
- Я ганаруся ўсёй прадукцыяй прадпрыемства, якая вырабляецца, - кажа Тамара Міхайлаўна. - Няма сэнсу спыняцца на дасягнутым. Заўсёды трэба ўдасканальвацца і рабіць усё, каб якасць была на вышэйшым узроўні. Дзякуючы ўсім супрацоўнікам і іх карпатлівай працы мы ідзем у нагу з часам, пашыраючы гарызонты, увасабляючы ў рэальнасць задуманае. Нам ёсць над чым працаваць. А вытворчасць вараных каўбас - адзін з тых новых напрамкаў у нашай дзейнасці, над якім будзем працаваць. Велізарны плюс і ў тым, што мы працуем на ўласнай сыравіне жывёлазабойнага цэха, а філе птушкі закупляем у ААТ «Агракамбінат «Дзяржынскі». Ужо сёння на прылаўках магазінаў Капыльскага райспажыўтаварыства можна набыць тры віды вараных каўбасных вырабаў: вышэйшага гатунку «Сметанковая» і «Смачная», 1 гатунку – «Аматарская адмысловая».
Асартымент прадукцыі Капыльскага кааппрама
Цікава, як усё ж адбываецца тэхналагічны працэс стварэння вараных каўбас? Вырашылі даведацца. Папярэдне ўзгадніўшы час, прыбылі ў Капыльскі кааппрам. Нас сустракае начальнік вытворчасці Тамара Шкурынская. Невялікі інструктаж - і мы накіраваліся ў каўбасны цэх. Тут у аддзяленні састаўлення фаршу ўсталяваны той самы вакуумны кутэр аб'ёмам 125 літраў, выраблены з харчовай нержавеючай сталі. Варта адзначыць, што галоўнай адметнай асаблівасцю дадзенай мадэлі з'яўляецца гідрапрывад на ўздым, апусканне выгружальніка і вакуумнага вечка.
- Спачатку было крыху хвалююча працаваць з новай устаноўкай, - кажа Тамара Аляксееўна. - Але, як аказалася, усё проста. На кутэры ўсталявана сэнсарная панэль, якая адлюстроўвае інфармацыю аб частаце кручэння нажавога вала, кручэнні чары, тэмпературы фаршу, часу кутэравання і ступені вакууму – усё гэта ў цэлым значна палягчае працу.
Перад тым, як мяса пагрузіць у чару кутэра, неабходна правесці шэраг тэхналагічных аперацый: раздзелку тушы, аддзяленне мясной мякаці ад косткі, выдаленне сухажылляў, дробных костак і храсткоў. Пасля наразаюць мяса кавалкамі па 400-500 грам і прапускаюць праз мясарубку-ваўчок.
Састаўляльнiк фаршу Алег Бельскі разам з начальнікам участка Наталляй Хрытонавай кантралюе працэс замесу каўбаснага вырабу, па чарзе загружае сыравіну ў чару - ялавічыну, свініну і комплексныя дабаўкі.
Тамара Шкурынская дадала, што пры кутэраванні да мяса абавязкова дадаюць лёд, што дазваляе падтрымліваць у фаршы тэмпературу не вышэй за 12 градусаў, бо пры павышэнні тэмпературы аддзяляецца тлушч і якасць прадукцыі пагаршаецца.
Закрываецца вакуумнае вечка, і на працягу 15 хвілін адбываецца замес фаршу. Стоп, машына! Гатовая сумесь выгружаецца ў асобныя ёмістасці і адпраўляецца да іншай не меней важнай усталёўкі – гідраўлічнаму шпрыцу. Тут умела і спрытна напаўняе абалонку фаршам фармоўшчык каўбасных вырабаў Наталля Каско. Пара хвілін, і адзін батон варанай каўбасы гатовы. Але, каб завяршыць працэс яе вырабу, далей па інструкцыі iдзе ўляганне каўбасных вырабаў, праводзіцца іх тэрмічная апрацоўка ў параварачнай камеры пры тэмпературы 75-80°З. У завяршэннi адпраўляецца на склад гатовай прадукцыі.
Каля 3 гадзін пайшло на тое, каб зрабіць адну партыю вараных каўбас. Гэта цікавы і займальны працэс, над якім працуюць вопытныя і кваліфікаваныя спецыялісты. Дзякуючы ім на прылаўках магазінаў з'явіліся новыя смачныя і духмяныя каўбасы Капыльскага кааппрама.
Варта адзначыць, што прадпрыемства штогод радуе спажыўцоў новымі вырабамі. Так, можна набыць вафлі «Венскія» (за тры тыдні рэалізавана 35 кілаграм у краме №1 па вул. Заазёрнай), багет для бутэрбродаў з дабаўленнем сыру, бекону, грыбоў і хлеб пшанічны «Аколіца», які за маленькі прамежак часу палюбіўся шматлікім пакупнiкам.
Наталля ДАВЫДЗЕНКА
Крыніца «СП»
