Капыльшчына прымала ўдзельнікаў рэспубліканскага патрыятычнага праекта «Зімовы маршрут».
Арганізатарам выступае Рэспубліканскі штаб студэнцкіх атрадаў БРСМ пры падтрымцы Міністэрства адукацыі і органаў выканаўчай улады. Сёлета да праекту ў Мінскай вобласці далучыліся дзве каманды «Сэрца Поўначы» і «Натхненне». Першая адправілася ў экспедыцыю ў Нясвіжскі і Капыльскі раёны, другая - у Слуцкі і Салігорскі.
– Мы рады, што сёлета Капыльшчына прымае такі значны і шматгранны маладзёжны праект, які закранае і прафарыентацыю, і патрыятычнае выхаванне. Гэта тым больш сімвалічна ў Год міру і стварэння, - адзначыла першы сакратар РК ГА «БРСМ» Анастасія Збіруховіч.
Атрад «Сэрца Поўначы» аб'яднаў 19 студэнтаў з розных куткоў Беларусі. Упершыню ў гэтым годзе да праекту далучыліся і студэнты з Расіі: Капыльшчыну наведала прадстаўнік аднаго з самых буйных гарадоў Расіі - Омска. Камісар - Архіп Змітраковіч, камандзірам атрада абраны Максім Дзяменцьеў, хлопцы з'яўляюцца студэнтамі Полацкага дзяржаўнага ўніверсітэта.
Знаёмства з нашым краем пачалося з агляднай экскурсіі па горадзе Капылi. Рабяты прайшлі па маршруце «Як помнік былога, як быль» і азнаёміліся з экспазіцыямі раённага краязнаўчага музея. На працягу двух дзён байцы атрада правялі насычаныя мерапрыемствы для навучэнцаў Семежаўскай і Цімкавіцкай сярэдніх школ. Тут студэнты зладзілі для рабят майстар-клас па твістынгу, пляценню фенечак, правялі «Вясёлыя старты», шэраг прафарыентацыйных інтэрактываў, тэматычных і ваенна-патрыятычных заняткаў. Прадстаўнікі студэнцкай моладзі таксама падрыхтавалі для навучэнцаў канцэрт, які прайшоў на адным дыханні і падарыў гледачам шмат незабыўных уражанняў.
Знаёмства маладых людзей з нашым раёнам працягнулася ў сценах раённага цэнтра ткацтва, дзе ўдзельнікі праекта даведаліся пра гісторыю стварэння ткацкага рамяства, аб ткачыхах, якія праславілі Семежава і Капыльскі раён, бо працы тутэйшых майстрых ведаюць далёка за межамі Беларусі.
Асабліва цікавым стаў таварыскі матч паміж байцамі каманды «Сэрца Поўначы» і навучэнцамі каледжа. Гульня аказалася напружанай і відовішчнай, першынство пераходзіла ад адной каманды да іншай. Кожная з якіх старалася апынуцца ў лідэрах, дэманстравала сваю шпаркасць, спрыт, цягавітасць і, вядома ж, трапнасць. А галоўны вынік таварыскай сустрэчы - пазітыўны настрой і праведзены з карысцю час.
Па ходзе маршруту байцы студ-атрада таксама правялі працоўную акцыю ў Капыльскім дзяржаўным каледжы. Узброіўшыся неабходным інвентаром, студэнты прыводзілі ў парадак тэрыторыю сядзібы «Мядовая заімка»: прыбіралі апалыя галінкі, збіралі смецце, зграбалі апалае лісце. Працавалі ўсё дружна і з задавальненнем. Увогуле, весела і з карысцю бавілі час.
Рэспубліканскі патрыятычны праект «Зімовы маршрут», які праводзіўся з 25 па 31 студзеня, - гэта комплекс мерапрыемстваў, накіраваных на станаўленне грамадзянскай пазіцыі моладзі, рэалізацыю іх працоўнага, камунікатыўнага і творчага патэнцыялу. Сёлета ён аб'яднаў амаль 150 актыўных маладых людзей з ліку студэнтаў устаноў вышэйшай і сярэдняй спецыяльнай адукацыі, а гэта сем працоўных калектываў. Асноўная канцэпцыя праекта - арганізацыя мерапрыемстваў з насельніцтвам па патрыятычнаму выхаванню дзяцей і моладзі ў малых населеных пунктах, развіццё маладзёжных ініцыятыў, фарміраванне культуры здаровага ладу жыцця, прафарыентацыя і мн. інш.
Таццяна Бохан
Крыніца «СП»
