Пасяджэнне арганізацыйнага камітэта па будаўніцтве Беларускай партыі «Белая Русь» праходзіць у Нацыянальнай бібліятэцы, перадае карэспандэнт БЕЛТА.
У склад аргкамітэта ўваходзяць прадстаўнікі грамадзянскай супольнасці, кіраўнікі найбуйнейшых грамадскіх аб'яднанняў.
«Гэта партыя будуецца з нуля, - адзначыў старшыня Рэспубліканскага грамадскага аб'яднання «Белая Русь» Алег Раманаў. — Мы не пераўтвараем грамадскае аб'яднанне «Белая Русь», яно застаецца ў палітычнай і грамадскай прасторы краіны. Новая партыя — гэта будзе самастойная сіла, якая накіравана на рашэнне тых вострых праблем, якія стаяць перад нашым грамадствам, і ў цэлым у свеце. Калі казаць аб прычынах таго, чаму мы падышлі да стварэння палітычнай партыі, — іх некалькі. Па-першае, гэта ўзрослая сталасць грамадзянскай супольнасці нашай краіны. Людзі адчулі неабходнасць актыўнага ўдзелу ў палітычным жыцці. Людзі хочуць самі тварыць сваю будучыню, будучыню сваёй краіны, сваіх дзяцей. Па-другое, мы разумеем, што патрэбны суб'екты адказу на тыя жорсткія выклікі, якія кінуты нашай краіне. У свеце ідзе вайна. І для таго, каб Беларусь была востравам стабільнасці, росквіту і поспеху, мы павінны прадпрымаць вельмі сур'ёзныя намаганні, патрэбны арганізаваныя сілы. Наша партыя будзе адной з такіх сіл, якая зможа генераваць адказы на тыя выклікі, якія неабходна вырашаць у нашай краіне».
Паводле яго слоў, пабудова партыі ў яе фармальнай частцы будзе завершана да канца вясны. «А затым пачнецца працэс актыўнага станаўлення партыі як палітычнай сілы, удзелу ва ўсіх значных палітычных падзеях, у наступным удзелу ў электаральнай кампаніі. Я думаю, што за адносна кароткі час мы зможам стаць значнай палітычнай сілай у краіне, якой па плячы шматлікія важныя задачы», — дапоўніў Алег Раманаў.
Крыніца «СП»
