Адзінаццацікласніца гімназіі №1 г. Капыля Віялета Астрэйка — яркая і неардынарная асоба. Дзейная, камунікабельная дзяўчына, з шырокім даляглядам і вялікім імкненнем да самаадукацыі.
Юная гімназістка з'яўляецца старшынёй Маладзёжнага парламента пры Капыльскім раённым Савеце дэпутатаў. Да таго ж, удастоена звання «Вучань года Мінскай вобласці-2022».
Віялета ўмее згуртаваць вакол сябе аднакласнікаў, праявіць ініцыятыву, дабіцца намечаных вынікаў. Ёй цікавы новыя веды, дзякуючы чаму яна паспяхова рэалізуе сябе ў розных сферах дзейнасці. Гімназістка была ўдастоена гонару ўсталяваць таблічку з QR-кодам каля помніка воінам-вызваліцелям разам з арганізатарамі рэспубліканскай акцыі «Сімвал адзінства», якую Капыльшчына прымала ў лістападзе мінулага года. Аптымізм - характэрная рыса школьніцы.
Адзінаццацікласніца прымае актыўны ўдзел у грамадскім жыцці раёна, з'яўляецца пастаяннай удзельніцай акцый, якія праводзяцца Капыльскім РК ГА «БРСМ», а таксама членам маладзёжнага атрада аховы правапарадку і валанцёрскага атрада «Добрае сэрца». Не чужая юнаму таленту і даследчая дзейнасць. Так, летась стала пераможцам раённага конкурсу даследчых работ у секцыі «Літаратуразнаўства». Віялеце цікавы мерапрыемствы грамадзянска-патрыятычнай, духоўна-маральнай, экалагічнай накіраванасцяў і многія іншыя.
Крыніца «СП»
