Навасёлкаўскі фельчарска-акушэрскі пункт стаў пераможцам абласнога агляду якасці і культуры медыцынскага абслугоўвання насельніцтва за 2022 год.
Навасёлкаўскі ФАП заваяваў пальму першынства сярод пунктаў з колькасцю абслугоўваемага насельніцтва менш за 500 чалавек. Што і нядзіўна, бо некаторы час таму медыцынскае падраздзяленне пераехала ў будынак мясцовай школы, пад яго адвялі прасторныя і светлыя памяшканні былых школьных майстэрняў, папярэдне іх адрамантаваўшы.
Без малога сорак гадоў працуе там фельчар вышэйшай катэгорыі Наталля Сельвановіч, яна ж і загадвае ФАПам. У яе на ўчастку - 420 чалавек. І кожнаму з іх Наталля Эдуардаўна гатова аказаць своечасовую дапамогу, а часам проста выслухаць і пабыць трошкі псіхолагам.
Сёння ў медыцынскім падраздзяленні можна прайсці флюараграфію і прафагляд для жанчын. А дыспансерызацыяй ахоплена амаль сто працэнтаў насельніцтва. Пры ФАПе працуе аптэчны пункт, дзе можна набыць самыя неабходныя медпрэпараты.
Крыніца «СП»