У ваенных камісарыятах Мінскай вобласці пачаліся планавыя мерапрыемствы па прызыве грамадзян на тэрміновую ваенную службу і службу ў рэзерве.
Ваенны камісар Мінскай вобласці палкоўнік Ігар Тарабеш распавёў пра яго асаблівасці. Ён адзначыў, што ў адпаведнасці з Указам Прэзідэнта Рэспублікі Беларусь №19 ад 24 студзеня 2023 года «Аб звальненні ў запас і прызыве на тэрміновую ваенную службу, службу ў рэзерве», цяпер у Мінскай вобласці праводзяцца планавыя мерапрыемствы прызыву на тэрміновую ваенную службу, службу ў рэзерве грамадзян Рэспублікі Беларусь мужчынскага полу, якім да дня прызыву спаўняецца 18 гадоў і якія не маюць права на адтэрміноўку ад прызыву, а таксама грамадзян прызыўнога ўзросту, якія страцілі права на адтэрміноўку.
Адначасова Указам прадугледжваецца звальненне ў запас ваеннаслужачых, якія выслужылі ўстаноўленыя тэрміны.
Гэтыя мерапрыемствы ўключаюць у сябе медыцынскі агляд прызыўнікоў, усебаковае вывучэнне іх маральных і дзелавых якасцей, вывучэнне і адбор службовымі асобамі камплектуемых воінскіх часцей і ваенных камісарыятаў, а таксама пасяджэнне прызыўных камісій.
Падчас медыцынскага агляду прызыўнікоў да іх будуць прымяняцца новыя патрабаванні да стану здароўя для праходжання ваеннай службы. Змяненні гэтых патрабаванняў былі накіраваны ў першую чаргу на павелічэнне магчымасцей паступлення грамадзян у ваенныя навучальныя ўстановы, а таксама на ваенную службу па кантракту, у тым ліку грамадзян, якія падлягаюць прызыву на тэрміновую ваенную службу, службу ў рэзерве.
Як паведаміў намеснік начальніка напрамку ідэалагічнай работы і сацыяльнай абароны ваеннага камісарыята Мінскай вобласці Уладзімір Сыпаў, усяго з Мінскай вобласці падлягае адпраўцы вясной каля 1500 прызыўнікоў. У Капыльскім раёне, паводле слоў начальніка адасобленай групы ваеннага камісарыята Нясвіжскага і Капыльскага раёнаў Сяргея Маргаліка, будуць накіраваны на праходжанне медыцынскай камісіі каля 50 маладых чалавек.
Галоўным і нязменным патрабаваннем прызыву грамадзян з'яўляецца якасць прызыўнога кантынгенту. Бо менавіта яму праз некаторы час, прыняўшы Ваенную прысягу, трэба будзе аберагаць мірную працу і спакой грамадзян нашай краіны.
Сяргей КОЗЕЛ
Крыніца «СП»
