У дыскусійнай пляцоўцы прынялі ўдзел старшыня Пастаяннай камісіі Палаты прадстаўнікоў Нацыянальнага сходу Рэспублікі Беларусь па бюджэце і фінансах Людміла Ніжэвіч, а таксама актывісты раённай арганізацыі РГА «Белая Русь» з усяго рэгіёну, якія прадстаўляюць розныя галіны і сферы дзейнасці, у тым ліку супрацоўнік рэдакцыі раённай газеты «Слава працы».
Адкрываючы мерапрыемства, старшыня раённага Савета дэпутатаў, лідэр раённай арганізацыі РГА «Белая Русь» Ірына Кісляк нагадала, што праект праграмы Беларускай палітычнай партыі «Белая Русь» быў абнародаваны 28 лютага і вынесены на грамадскае абмеркаванне. Ён размешчаны на сайце РГА «Белая Русь», там жа ёсць форма зваротнай сувязі, і грамадзяне з розных рэгіёнаў краіны і сацыяльных груп, прадстаўнікоў розных прафесій і відаў дзейнасці могуць даслаць свае прапановы, якія будуць улічаны ў ходзе падрыхтоўкі выніковага варыянта. Адзначана, што стратэгічная мэта партыі - умацаванне незалежнай, моцнай, квітнеючай Беларусі і пабудова сацыяльна справядлівага грамадства. Яна прадугледжвае аб'яднанне грамадзян Рэспублікі Беларусь на аснове нацыянальных інтарэсаў і духоўна-маральных каштоўнасцей беларускага народа.
– Праект праграмы ўключае ў сябе такія напрамкі, як палітычны ўдзел, закранае пытанні моцнай эканомікі, дабрабыту грамадзян, культуры, традыцыі, памяці, накіраванасці знешняй палітыкі. Яны абапіраюцца на фундаментальныя прынцыпы развіцця нашай дзяржавы і канстытуцыйнага ладу, - падкрэсліла Ірына Мікалаеўна.
Удзельнікі дыялогавай пляцоўкі выказаліся аб тым, што ідэя стварэння палітычнай партыі даўно лунала ў нашым грамадстве. Таму менавіта яна стане той палітычнай сілай, якая напоўніць канкрэтнай працай у інтарэсах дзяржавы і кожнага чалавека. Адзначым, што прапановы, унесеныя членамі Капыльскай раённай арганізацыі «Белая Русь», улічаны і будуць перададзены ў рэспубліканскі аргкамітэт. Так, дэлегат устаноўчага з'езда, намеснік галоўнага ўрача па медабслугоўванні насельніцтва Капыльскай ЦРБ Ілля Паддубскі адзначыў, што фармулёўка праекта праграмы мае патрэбу ў карэкціроўцы: «ліквідацыю залежнасці ад знешніх рынкаў, у першую чаргу ад паставак вуглевадароднай сыравіны». На яго думку, таксама трэба зрабіць акцэнт на «зніжэнне шкодных выкідаў у навакольнае асяроддзе». А вось старшыня Пацейкаўскага сельвыканкама Сяргей Цвірко акцэнтаваў увагу на пераемнасці пакаленняў і неабходнасці замацавання гэтага аспекту ў дакуменце партыі.
18 сакавіка пройдзе ўстаноўчы з'езд, на якім будуць прыняты праграмныя дакументы, шырокае абмеркаванне якіх праходзіць цяпер. Пасля прыняцця дакумента і статута партыі пачнецца работа па забеспячэнні ўзаемадзеяння грамадзянскай супольнасці і дзяржавы з улікам прыярытэтаў беларускага народа. Назапашаны грамадскімі аб'яднаннямі багаты вопыт будзе выкарыстоўвацца для будаўніцтва сучаснасці і будучыні нашай краіны.
■ Дырэктар СШ №2 г. Капыля Ірына Абас, Ірына Кісляк і дырэктар Капыльскага дзяржаўнага каледжа абмяркоўваюць актуальныя пытанні
— Мне як дэлегату рэспубліканскага ўстаноўчага з'езда, на якім яшчэ давядзецца пабываць, прыемна ўсведамляць, што абмеркаванні праходзяць актыўна, — выказала сваё меркаванне намеснік галоўнага рэдактара рэдакцыі газеты «Слава працы» Таццяна Бохан. - Упэўнена, што партыя будзе адкрыта для ўсіх жадаючых і мы ўбачым у нашых шэрагах сапраўдных патрыётаў і аднадумцаў. Яна дапаможа паспяховай рэалізацыі дзяржаўнай палітыкі Рэспублікі Беларусь.
