Штогод дзяржаўнае свята — Дзень Канстытуцыі Рэспублікі Беларусь збірае актыўных, таленавітых і мэтанакіраваных хлопчыкаў і дзяўчынак Капыльскага раёна. У гэты знамянальны дзень у рамках Усебеларускай акцыі «Мы - грамадзяне Беларусі!» 20 навучэнцам агульнаадукацыйных навучальных устаноў горада і раёна ўручылі галоўны ў жыцці кожнага чалавека дакумент - пашпарт.
Павіншаваць хлопцаў прыйшлі ганаровыя госці: старшыня райвыканкама Сяргей Пілішчык, пракурор Капыльскага раёна Арцём Ляўша, начальнік аддзялення па грамадзянстве і міграцыі РАУС Вераніка Падневіч, першы намеснік начальніка Капыльскага РАНС Дзмітрый Шаўроў, старшыня раённага Савета ветэранаў Людміла Камянко, намеснік начальніка аддзела ідэалагічнай работы, культуры і па справах моладзі райвыканкама Наталля Гарбацэвіч, першы сакратар РК ГА «БРСМ» Анастасія Збіруховіч, галоўны спецыяліст упраўлення па адукацыі, спорце і турызме райвыканкама Валерыя Леўс і начальнік аддзела ЗАГС Вікторыя Траяновіч.
Прыбраныя і прыгожыя юныя капыляне прымалі віншаванні ад Сяргея Пілішчыка:
— Дзень Канстытуцыі Рэспублікі Беларусь - гэта вялікае дзяржаўнае свята. Асноўны Закон увасабляе гістарычную памяць беларускага народа, суверэнітэт і незалежнасць нашай краіны. Сімвалічна, што менавіта ў гэты дзень вы, маладыя грамадзяне Капыльскага раёна, атрымалі свой першы важны ў жыцці дакумент - пашпарт грамадзяніна нашай краіны..
Арцём Ляўша дапоўніў, што дакумент, які сведчыць асобу, пацвярджае грамадзянства чалавека і дае магчымасць яму рэалізоўваць увесь комплекс правоў і свабод, замацаваных Асноўным Законам нашай дзяржавы. Гаворачы мовай юрыдычнай, грамадзянства - гэта ўстойлівая прававая сувязь чалавека з Рэспублікай Беларусь, якая выяўляецца ў сукупнасці ўзаемных правоў, абавязкаў і адказнасці за свае ўчынкі.
Са словамі падзякі ад моладзі выступіў навучэнец СШ № 2 г. Капыля Арцемій Карпеленя:
— Атрыманне пашпарта – важная і ўрачыстая падзея ў жыцці кожнага маладога чалавека. Мы – маладое пакаленне, па-сапраўднаму ўсведамляем ускладзеную на нас адказнасць. Усе свае сілы і веды мы аддамо на карысць сваёй Радзімы. Заўсёды і ва ўсім будзем кіравацца слаўнымі, працоўнымі і баявымі традыцыямі нашых бацькоў і дзядоў..
Пасля цырымоніі ўручэння пашпартоў школьнікі прамовілі клятву грамадзяніна Рэспублікі Беларусь.
У гэты дзень увазе хлопчыкаў і дзяўчынак таксама была прапанавана экспазіцыя «Мы — грамадзяне Рэспублікі Беларусь»якую арганізавала загадчыца аддзела абслугоўвання і інфармацыі Капыльскай раённай цэнтральнай бібліятэкі імя Анатоля Астрэйкі Ірына Пятровіч. Яна азнаёміла ўсіх прысутных з Асноўным Законам краіны..
Завяршальнай часткай мерапрыемства стала экскурсія ў раённы краязнаўчы музей, дзе старшы навуковы супрацоўнік Таццяна Варанцова правяла экскурсію, пазнаёміўшы хлопцаў з выставай «Генацыд - злачынства без тэрміна даўнасці».
Наталля ДАВЫДЗЕНКА
