Самая маштабная дабрачынная акцыя «Падары радасць бліжняму» працягвае ў светлыя велікодныя дні запальваць праменьчык святла і надзеі ў сэрцах тых, хто мае найбольшую патрэбу ў клопаце і ўвазе. На гэты раз яна зазірнула ў Капыльскую спецыяльную школу-інтэрнат.
- Хрыстос Уваскрэс! — павіталі выхаванцаў ганаровыя госці — старшыня райвыканкама Сяргей Пілішчык, благачынны цэркваў Капыльскай акругі Андрэй Еўшэль і начальнік упраўлення па адукацыі, спорце і турызме райвыканкама Алена Карповіч .
- Сапраўды Уваскрэс! - хорам адказвалі хлопцы.
— Традыцыйнае праваслаўнае свята Вялікадня лічыцца адным з галоўных у годзе, — расказаў хлапчукам і дзяўчынкам айцец Андрэй. - У гэты дзень людзі святкуюць уваскрасенне Збавіцеля, якое здарылася на трэці дзень пасля яго смерці - распяцці на крыжы. Ісус Хрыстос быў пасланы Богам на зямлю для нашага збаўлення ад грахоў, ад здзяйснення дрэнных учынкаў. Ён вучыў людзей сваім прыкладам - дабрынёй, справядлівасцю і самаахвяраваннем. Я вас віншую з гэтым вялікім святам. Божага дабраславення. Маліцеся і гаварыце з Госпадам, прасіце ў яго дапамогі, і ён ніколі не адмовіць!
Свету і дабра, светлага святочнага настрою пажадаў кіраўнік раёна дзецям і тым, хто клапоціцца пра іх, пасля чаго прысутным былі ўручаны падарункі ад прыходу Спаса-Узнясенскага храма і прадстаўнікоў брацтва святара-мучаніка Уладзіміра Пастарнацкага г. Капыля. З падзякай прымалі хлопцы велікодныя кулічы і канцэлярскія тавары, і шчыра радаваліся чырвоным асвячоным яйкам. Ініцыятыва раённай улады і духавенства дазволіла ў чарговы раз прадэманстраваць адзінства, дабро і міласэрнасць беларускага народа.
Таццяна Бохан
Фота аўтара
Крыніца «СП»
