У гэтыя святочныя дні ўдзельнікі дабрачыннай акцыі «Падары радасць бліжняму» наведаліся і ў Капыльскі дом-інтэрнат для састарэлых і інвалідаў у в. Філіпавічы.
Пажадаць моцнага здароўя і міру кожнаму ў Капыльскі дом-інтэрнат для састарэлых і інвалідаў у в. Філіпавічы прыбылі старшыня раённага Савета дэпутатаў Ірына Кісляк, намеснік старшыні Капыльскага райвыканкама Святлана Маліноўская і пробашч парафіі храма Ушэсця Гасподняга в. Кіевічы, протаіерэй Павел Брагін. У фае ўсіх пастаяльцаў чакалі салодкія пачастункі: велікодныя яйкі і кулічы, духмяныя яблыкі і іншыя падарункі.
Чакаючы гасцей, хтосці ціха перашэптваўся, хтосці проста назіраў, як раптам пачуўся гучны голас: «Хрыстос Уваскрэс! Хрыстос Уваскрэс! Хрыстос Уваскрэс!» Усе як быццам ажывіліся і адказалі традыцыйным: «Сапраўды Уваскрэс!»
Павітаўшы прысутных, айцец Павел адзначыў, што самае галоўнае і значнае свята для ўсіх людзей - гэта Уваскрэсенне Хрыстова. Абапіраючыся на яго, мы даносім да людзей словы Збавіцеля аб тым, што ўсе павінны радавацца і за ўсё дзякаваць, бо такая воля Божая ў Iсусе Хрысце. Але самае важнае, гэта трэба прыняць і ўсвядоміць. І тады сапраўды ў жыцці кожнага шмат што зменіцца.
У гэты дзень не засталіся без увагі і наведвальнікі Грозаўскага псіханеўралагічнага дома-інтэрната для састарэлых і інвалідаў, дзе разам з імі ганаровых гасцей чакаў і настаяцель прыхода храма свяціцеля Мікалая Цудатворца аг. Грозава іерэй Сяргій Мархотка.
У знак падзякі наведвальнікі дома-інтэрната таксама падарылі гасцям сувеніры, вырабленыя сваімі рукамі.
Наталля ДАВЫДЗЕНКА
Фота аўтара
Крыніца «СП»
