На пасадцы лесу ў Коласаўскім лясніцтве разам з супрацоўнікамі Капыльскага вопытнага лясгаса быў заняты старшыня райвыканкама Сяргей Пілішчык.
Невялікі ўступны інструктаж па тэхніцы бяспекі - і ўсе дружна прыняліся за працу. З дапамогай мяча Колесава мужчыны прабівалі лункі ў зямлі, прыдатнай для высадкі саджанцаў на адлегласці не больш за 80 сантыметраў адна ад адной. У жанчын жа была іншая функцыя - акуратна пасадзіць маладняк лесу, сочачы за тым, каб карані добра апускаліся ў паглыбленне. Прыціскалі лунку нагой і гэтак далей па стандартнай схеме. Неўзабаве на 0.3 гектарах зямлі роўнымі радамі былі пасаджаны маладыя дрэўцы елкі і дуба.
У гэты дзень з 9:00 раніцы ў розных частках горада працавалі работнікі Капыльскай ЖКГ: пілавалі сухія дрэвы і хмызнякі, прыбіралі леташнюю лістоту па вуліцы Жылуновіча, а таксама на пойме ракі па вуліцы Дзяржынскага.
У мікрараёне, дзе знаходзіцца гаражны кааператыў на завулку Максіма Горкага, праца была больш складанай. Пластыкавыя і шкляныя бутэлькі, цвёрдыя бытавыя адходы апанавалі ўсю тэрыторыю. Некаторыя ўладальнікі каля сваіх гаражоў і зусім развялі сметнік.
Не варта забываць і пра тое, што выкід смецця ў не прадугледжаных для гэтага месцах цягне за сабой адміністрацыйную адказнасць. А камунальнікам прыйшлося вывезці не адну каляску са смеццем.
У аграгарадку Пясочнае некалькі дзён запар наводзілі парадак на могілках калектывы арганізацый і прадпрыемстваў раёна, у тым ліку Капыльскай ЖКГ і Бабаўнянскага сельсавета. Працавалі ў асноўным мужчыны, бо трэба было загрузіць вялікія цуркі ў каляску. Дробныя драўняныя адходы зграбалі ў кучы і спальвалі.
Наталля ДАВЫДЗЕНКА
Крыніца «СП»