Дзяржаўных узнагарод удастоены 56 прадстаўнікоў розных сфер дзейнасці. Адпаведны ўказ №128 Прэзідэнт Беларусі Аляксандр Лукашэнка падпісаў 2 мая. У ліку тых, хто ўзнагароджаны «Медалём за працоўныя заслугі» – дырэктар Капыльскага дзяржаўнага каледжа Анатоль Францавіч Пяткевіч і старшыня праўлення Капыльскага райспажыўсаюза Віктар Васільевіч Смусёнак.
- Мы вельмі рады ўзнагародам нашых землякоў і шчыра віншуем з тым, што іх праца адзначана на самым высокім дзяржаўным узроўні, – кажа старшыня Капыльскага райвыканкама Сяргей Пілішчык. - Такая высокая ўзнагарода - «Медаль за працоўныя заслугі» – гэта, перш за ўсё, заслуга ўсяго калектыву, а граматна арганізаванае кіраўніцтва спрыяе значным дасягненням. Асабліва прыемна, што ўзнагароджанне праходзіць у Год міру і стварэння. Ад імя раённага выканаўчага камітэта, раённага Савета дэпутатаў і ўсіх жыхароў Капыльшчыны жадаю Анатолю Францавічу і Віктару Васільевічу і далей таксама годна працаваць на карысць нашай роднай Беларусі
Варта адзначыць, што ордэны, медалі і ганаровыя званні прысуджаны за шматгадовую плённую працу, высокі прафесіяналізм, узорнае выкананне службовых абавязкаў, заслугі ў вайсковай службе і ахове дзяржаўнай мяжы, папярэджанні і ліквідацыі надзвычайных сітуацый прыроднага і тэхнагеннага характару, значны асабісты ўклад у рэалізацыю бюджэтна-фінансавай і падатковай палітыкі, развіццё судовай сістэмы, прыродаахоўнай і судова-экспертнай дзейнасці, нафтаперапрацоўчай, транспартнай і будаўнічай галін, рэальнага сектара эканомікі і знешнеэканамічных сувязяў, прамысловасці і сельскагаспадарчай вытворчасці, дасягненні ў грамадскай дзейнасці, адукацыі, навуцы, культуры і мастацтве.
Дзіяна Ткачэнка
Крыніца «СП»
