Капыльшчына далучылася да рэспубліканскай акцыі МНС «Не пакідайце дзяцей адных!», якая праходзіць з 10 мая па 1 чэрвеня. Асаблівая ўвага будзе прыкавана да праблем дзіцячага свавольства з агнём і гібелі дзяцей на пажарах.
— Кожны год дзеці становяцца ахвярамі надзвычайных сітуацый з прычыны свайго няведання ці легкадумнасці, а часцей па недаглядзе бацькоў, — адзначае спецыяліст сектара прапаганды і ўзаемадзеяння з грамадскасцю Марыя Дзічкоўская. - Акцыя прымеркавана да Міжнароднага дня сям'і і Міжнароднага дня абароны дзяцей і праходзіць у два этапы. Будзе арганізавана маштабная праграма з інтэрактыўнымі пляцоўкамі і конкурсамі, віктарынамі, гульнямі, удзельнікам якіх уручаць сувенірную, навучальную, наглядна-выяўленчую прадукцыю.
На плошчы Леніна не пакідаць дзяцей адных заклікалі работнікі РАНС сумесна з прадстаўнікамі маладзёжнага атрада аховы правапарадку РК ГА «БРСМ». Дзеці актыўна ўдзельнічалі ў прапанаваных заданнях: збіралі пазлы, знаходзілі небяспекі ў кватэры і адказвалі на пытанні віктарыны па асновах бяспекі. Ва ўзнагароду за ўдзел хлапчукі і дзяўчынкі атрымалі ад ратавальнікаў маляўнічую наглядна-выяўленчую прадукцыю супрацьпажарнай накіраванасці. Асаблівую ўвагу дзяцей прыкаваў сябар ратавальнікаў пажарны Спасайка, з якім фатаграфаваўся кожны ахвочы. Дзеці таксама маглі прымяраць і адзенне ратавальніка. А дарослых арганізатары акцыі заклікалі навучаць сваіх дзяцей правілам бяспечных паводзін і ні ў якім разе не пакідаць малалетніх дзяцей без нагляду.
— Несумненна, такія акцыі патрэбны, — гаворыць Любоў Мікалаеўна Аўсюк, якая прыйшла разам з чатырохгадовай унучкай Евай. - Своечасова навучыць рабят жыццёва важным правілам, быць для іх прыкладам і не пакідаць без нагляду - значыць зрабіць дзяцінства бяспечным. Відаць, што на інтэрактыўнай пляцоўцы хлопцам цікава. Да таго ж яны не толькі правялі час весела і цікава, але і напярэдадні летніх канікул паўтарылі правілы пажарнай бяспекі.
Таццяна Бохан
Крыніца «СП»
